Oil Palm leh Tung chin kara Inter-Cropping atan Cocoa chin a that dawn thu sawi

Agriculture Minister PC. Vanlalruata chuan Oil Palm leh Tung Cultivation karah Inter-Cropping tur atan Cocoa chin a that dawn thu a sawi.

Ni hnih awh tur ‘National Conclave on Cocoa, 2025’ chu nimin khan Assam Agriculture University, Jorhat-ah hawn niin he hun hi Agriculture Minister PC. Vanlalruata chuan khuallian niin a hmanpui a, Mizoram Sawrkar-in National Mission on Edible Oils (NMEO) hnuaiah Oil Palm Cultivation a kalpui mek thu leh NMEO – Oilseeds hnuaiah Tung Cultivation pawh nasa lehzuala kalpui tum a nih thu a sawi a. Kuthnathawktu (Farmers) te’n hlawkna an tel tam lehzual theihnan Inter-Cropping kalpui tum a nih thu leh heng Oil Palm leh Tung Cultivation karah hian Inter-Cropping tur atan Cocoa chin hi a that hle dawn thu a sawi a. “Eng thlai pawh ching dawn ila, a pawimawh hmasa ber chu farmers te’n a chi tha an dawn ngei theihna tura hmalak hi a ni,” a ti.

Minister chuan India ramin chocolate siamna atana Cocoa kan mamawh zat chu metric ton 1,20,000 a nih laiin, tun dinhmuna India in a tharchhuah chu metric ton 22,000 chauh a ni tih sawiin, “India ramin kan mamawh za zela 80 hi ramdang atanga lakluh a nih avangin sawrkar laipui pawhin Cocoa plantation zau zawka kalpui a nih theihna turin hma a la chho mek zel a. Cocoa chu Chocolate siamna atan mai bakah damdawi siamna (pharmaceutical) industry lamah te, Cosmetic siamnaah te leh Chhang siamna (confectionery) lamah te thlengin a tangkai em em a ni,” a ti bawk.

Agriculture Minister chuan Directorate of Cashew & Cocoa hotute chu Mizoram tlawh a Mizoram farmers te zirtirna pe tur leh Mizoram-ah Cocoa nursery dinpui turin a sawm nghal a. Directorate lam pawhin Minister sawmna hi tihhlawhtlin ngei an tum thu an hrilh nghal a ni.

“National Conclave on Cocoa hi Dr. Femina, Director, Direcorate of Cashew & Cocoa Development, Govt. of India-in a kaihruai a, India ram State hmun hrang hrang atangin farmers leh Scientist thahnem tak an tel a ni.