Serchhip-a Hotel pakhat a thleng Hotel-ah a thi

Kan ram leh hnam damlohna chhan hi eng nge ni?

- Rev. Dr. Zaichhâwna Hlâwndo

Kan hnam a dam lo a, kan ram a him lo a, kan thlarau, rilru leh taksa pawh ICU-ah kan awm mêk a, chhanchhuah ngaiin kan awm a ni tih chu tuman kan hai lovang. Kan chhe zo ta vek a, chhan tlâk pawh awm tawh lo ang êm chu kan la ni lo. Amaherawhchu tun anga kan kal a, chhiat lam kan pan zel a, siamthar kan nih loh chuan hnam ral mai tur, sualin a sal behna hnuaiah awmin talchhuah leh ngaihna awm lo khawpin kan awm mai ang tih a hlauhawm hlein ka hria.

Kan ram leh hnam dinhmun tha lo tak maia kan dinna chhanah hian tunge mawhphurtu ber ni ta ang le? Sual bul emaw a zung chawpa phawi a, phoro a, halral tur chu eng ber hi nge ni ang? Ni tin mai hian sual avangin kan rum a, tunge dik lo tiin kan inkawk kual a. Thenkhatin sawrkar hruaitute politician-te kan bur bun a, thenkhat lahin kohhran hi a ni kan ti bawk a. Kan kal dan a dik lo tih chu kan hre tlâng. Mahse engati nge tih leh engtin nge kan siam that dawn? Khawi atangin nge bul kan tan dawn? A eng ber hi nge siamthat hmasak tur ni a, engtianga siamthat tur nge tihah hian kan buai chu a ni ber mai.

Ram leh hnam veitu a siam tha thei anga insawi chu kan indaih mah mah tih mai turin kan tam bawk si. Ram rorelna atana party politics khelh thiamah phei chuan a champion thei tur thah mai hi party tinah hian an awm a. Ha hipa kan ram leh hnam diklohna leh siamthat ngaite bahlah miah lova sawi thei pawh kan tam. Mahse khawiahnge Politician taka kan ram leh hnam damna tur tak tak kengtute chu an awm? Khawiahnge dikna kengkawhtute chu? Khawiahnge fel taka roreltute chu? Khawiahnge rem len tirtu turte chu? Tunge he kan sal tanna khur ata hi min chhanchhuak tak tak dawn? Eng party mahin min ti dam lo chu a ni si a, engtin nge ni zel dawn tih hi Tlumtea thlirin kan thlir a, kan bei a dawng chu a nih tak ber hi.

Pastor te, kohhran hruaitute thahnem ngai taka chhun leh zan chawl hman lova ramchhunga Tirhkoh (Evangelist) rawngbawltute hian kan ram leh hnam heti tak maia kan chhiatna chhan hi enge nia kan hriat le? Kan rawngbawlna te hi hlawhtling viauin lang thin mah se, Rih-ar-tui phur an sawi ang maiin kan rawngbawlna hian hma kan sawn thei tak tak lo deuh chu a ni em? Ruihhlo ngai Camping chawl lovin kan siam a, sim tawk leh insiam tha piangthar let aia tam an pung zel emaw tih mai turte hi a chhan eng nge nia in hriat ve le? Jail lama rawngbawl thinte chuan thahnemngai takin chawl lovin tan In-ah rawng in bawl a, tan In-a tâng leh tur nitinin an pung zel bawk si. Tui chu a hnar a nut tlat chuan a mawng lam pawh a fim chuang dawn lo tihna a ni si. Khawi atang chiah hian nge sual hian bu a khuar a, phung velh an sawi ang maia kan ramah hian sual a pun zelna chhan hi eng nge ni ta ang? Sap thufingah chuan “Prevention is better than cure”, Tihdam aiin venhim a sawt zawk an ti a. Engtin nge he sual pung zel tur hi kan hmuhchhuah a, kan ven dawn? Khawi atangin nge he sual hi a lo kal a, khawiahnge bu a khuar in ngaihtuah ve ngai em?

Kan khawlaiah te chuan damdawi ruih ching rualte an vak suau suau a, chhungtin deuhthawah hian tihngaihna kan hriat loh sual hnathawhin min chenchilh a ni ber mai. Tualthahna rapthlâk tak takte chu kan kawtkai maiah a khat tawkin hriat tur a awm reng a. Hmanah chuan dan hre mi, Ukil pawh kut zung tang-a chhiar tham lek kan awm a, thubuai rem ngai pawh kan awm meuh lo. Tunah chuan Dan hremi (Lawyer) hna chu pawisa hmuhna tha berte zinga mi a lo ni ta. High Court building var vo maite chu kan tlang ram mawi tivultuah kan hmang ta! Natna kan hmel hriat ngai loh tihbaiawm tak takte chuan engtik lai pawhin kan ram dung leh vang a fang kual reng emaw tih mai tur a ni. Kristian ram, Pathian nung biate awmnaah heng zawng zawng lo awmna chhan hi eng nge ni ta ang le?

Khawvel finna leh thiamna a lo sang zêl a. Damdawi lam kan mithiamte chuan damlo an enkawl hma leh damdawi an pek hmain uluk takin damlote chanchin an zir chiang hmasa thin. Khawl hrang hrang hmangin uluk thei ang berin an damlohna chhan te an chhuichhuah hnuah damdawi an pe thin. Kan ram leh hnam damlohna chhan hi beng sika ngaihtuah a hun tak zet zet a ni. Sual hian khawiahnge bu a khuar a, engtin nge min eichhiat tih hi kan hriatchian hunah a zungah kan phawi anga, kan halral vek ang. Goliatha ber a tluk tawh chuan Israel fate tan hlauh tur a awm tawh dawn lo.

He ka thu rawn ziah zawhna leh chhanna, kan damna tur thu chu Zofate chenna Zoram dung leh vang fangin kum 10 kan au ta! Thildang a ni lo, Kan rama rorelna thutthleng hi Luciferan party politic hmanga a chuh tlat vang a ni. Thlarau sual hian lal leh thuneihna zawng zawng hi chelh a tum a. Lalpa mite hi min bum a, keimahni leh keimahni lal leh thuneih inchuhin min indo tir a ni.

Lalpa’n ka pianna rama min rawn tirh hawna chhan ber chu tuna kan sawi tak zawng zawng pumpelhna awmchhun, amah kan Lalpa Isua Krista chauh a ni a, amah chu kan ram leh hnam hruaitu atana kan thlan hunah sual leh ramhuaite an tlawm tawh ang a, chhandam fate kan zalenna kawl a lo eng dawn a ni. Pathian Lal Ram Sawrkar (PLRS) a din hmain sual awpbehna salah kan la tang rih a nih hi. Beidawng lo ila, kan hma lama khawdur hian kian hun a la nei dawn. Kan hneh theih loh hi Lalpa’n min la hneh sak dawn a. Kan Kristianna nena inrem thlap rorelna Lalpa’n min buatsaih sak dawn a ni. Chu a lalna ramah chuan rem thu a leng tawh dawn a, Lalpa’n a chhiahhlawhte hmangin ro min rel sak tawh dawn a ni. Khawvelin min lo hmusit thin tawh mah se, Isua hming chauh kan chhuan tawh dawn avangin ama zarah ropuiin khawvelah pholan kan ni dawn a ni.