Serchhip-ah ‘National Sports Day’ hmang dawn

Ramchhung hmundangte rualin tun thla ni 30 khian Serchhip-ah pawh ‘National Sports Day’ hman a ni dawn.
    National Sports Day hi India Hockey thiam leh lar, Dhyan Chand-a piancham hriatreng nan India ram pumah August 29-ah hman thin a ni a. Kumin hian State bakah District tinah lawm tur niin August ni 29 atanga August ni 31 chhunga hmang turin Sawrkar Laipui chuan State tin hotute a hriattir a. Hemi ang hian Serchhip District-ah pawh hman tura ruahman niin nimin khan District Bawrhsap, Paul L. Khuma hovin he ni hman dan tur hi ngaihtuah a ni. Ruahman ang chuan National Sports Day hi Serchhip-ah chuan August ni 30, 2025 (Inrinni)-ah Serchhip Sports Complex-ah hman tura rel a ni a. Hemi ni hian Serchhip District chhunga Sports Association hrang hrang a tam thei ang ber tel tura beisei an ni a. District Sports Committee Office Bearers te leh Nodal Officer te chuan he ni hman dan tur chu an rel dawn a ni.