Naupangte tana Dan pawi-mawh zirhona neih a ni

Serchhip District chhunga Special Juvenile Police Unit (SJPU) te leh Police Personnel te tan nimin khan Serchhip SP Conference Hall-ah Juvenile Justice (Care and Protection) Act, 2015 leh Protection of Children from Sexual Offences Act (POCSO Act) chungchang zirhona neih a ni.
Superintendent of Police, District Child Protection Unit (DCPU) leh District Legal Services Authority (DLSA) Serchhip te tangkawpin an buatsaih he zirhona hun hi District Child Protection Unit (DCPU)-a Protection Officer (NIC) Vanlalmuanpuii chuan kaihruaiin Serchhip SP Gavit Gogna chuan he zirhona hun hi a hmanpui a, Dan hriat pawimawhna te sawiin, he huna tel te chu an hnathawhna kawngah an thil zir te tangkai taka an hman theihna tura ngaihtuahna hmang turin a chah bawk a ni.

Nimin-a he zirhona hunah hian Serchhip-a District Child Protection Officer (DCPO) R. Lalramdinmawii chuan Juvenile Justice (Care and Protection) Act 2015 chungchangan kalkhawm te zirtirna pein Addl. Public Prosecutor Lalro-sanga Colney chuan SJPU te leh an thawhpuite mawhphurhna leh naupang Dan zawm lo te thubuai kalpui dan tur leh enkawl dan tur leh Prevention of Children from Sexual Offences (POCSO) Act chungchang a zirtir a. DCPU Serchhip-a LPO Saizikpuia Sailo chuan Serchhip District a JJB case neih tawh dan report a pe bawk a ni.

He huna tarlan a nih danin Serchhip-a District Child Protection Unit (DCPU) hawn a nih, kum 2012 atanga kumin (2015) thleng hian Juvenile Justice Board (JJB) chuan thubuai chi hrang hrang 273 zet an ziaklut tawh a. Kum 4 kalta, kum 2022-2025 chhung bikah thubuai 52 ziahluh niin heng te hi mipa 48 leh hmeichhia 4 te an ni a. Heng kum tlinglo te hi MV Act, MLP Act, ND&PS Act leh POCSO Act kaihhnawih a thubuai nei te chu a tam ber niin JJB chuan heng thubuai ziahluh te hi an chingfel thin a ni.