Chief Minister's Rubber Missions sawihona nei

Chief Minister's Rubber Missions kalpui mek chungchang chu nimin khan Chief Minister Lalduhoma hovin sawiho a ni.

CM Conference Hall-a he sawihona hunah hian CM Rubber Missions thawh hnihna (Second Phase) kalpui dan tur tlangpui sawiin, Ram hectare khata zauva Rubber kung 450 vel phun chu chhungkaw pakhat tan a beitham deuh dawna a lan avangin hectare hniha zau thlenga an tihzauh theih tur ram pek dan awm thei se, tanpuina chu hectare khat atan pek phawt a, a tul anga a kumleh lama a pek belh dan dap thin nise an ti a. Rubber tiak tha chauh loneituten an dawn theih nana hmalak dan tur tha nia an hriatte pawh sawiin, a chingtu tur ten a chi tha, chintlak nia an hriat chauh an lei theih dan ruahmanna siam nise an ti bawk.

Mizoram sawrkar in a kalpui mek Chief Minister Rubber Mission hi NABARD Fund leh Handholding sum hmanga kalpui a ni a, a thawh hnihna atan inbuatsaih chhoh mek niin a thawh hnihna ah hian Handholding atangin chhungkaw 1373 leh NABARD atangin chhungkaw 1200 te nena thawhho tur a ni a. Nimin-a thutkhawm ah hian Progress Partner thlan dan tur pawh chipchiar takin an sawi a ni bawk. He thutkhawm ah hian Land Resources, Soil & Water Conservation-a Department hotute chu Minister Lalthansanga hova telin Mizoram Rubber Society an tel bawk a ni.