Ruihhlo fihlim san engemaw zat la awm mek

Hulhliap Short Stay Center atanga chhuak zingah ruihhlo la fihlim san engemaw zat an la awm.

Hulhliap Short Stay Center Core Committee chu nimin khan thukhawmin an hmalakna te an thlirho a. Hulhliap SSC Batch 1-na ah khan a tawp thleng mi 116 awmin heng hi an chhuah hnuah Volunteer mi 43 in Follow-up psychosocial-counselling neiin Home Visit vawi 4 an nei tawh a, heta an hmuh danin mi 46 te chuan ruihhlo an la fihlim san a. Batch 2-na ah mi 263 awm tluanin anni pawh hi Volunteer 53 in an umzui nghal a. Home Visit vawikhat nei tawhin mi 162 chuan ruihhlo an la fihlim san bawk a ni. Hulhliap Camping atanga chhuak hi mi 379 an awm tawh a. Batch hnih atan hian Task Group hrang hrang sum hman tur Rs.81,93,852/- pek chhuah tawh a ni a. Batch 3-na hi August ni 25-ah tan leh tur niin Hulhliap SSC Program hi thla tin nakum March thla thleng chhunzawm tura ruahman phawt a ni.

Hulhliap SSC atanga Camp chhuak te tan hian follow-up bakah Skill Training ruahman a ni bawk a, mi 50 tan Mistiri Training bakah Plumbing, Aluminium Fabrication leh Assisstant Electrician chu mi 30 theuh tan ruahman a ni a, mi 25 tan Basic Food Processing Course pawh ruahman niin thla thar September 1-ah tan tura ruahman a ni.