Sports discipline 9-ah GSDP kalpui a ni dawn

Grassroots Sports Development Prog-ramme (GSDP) hnuaiah kum 2025-2026 chhung hian Sports discipline pakua (9)-ah hmalak a ni dawn.

Mizoram State Sports Council (MSSC) leh Samagra Shiksha Mizoram (SSM) ten Memorandum of Understanding (MoU) an ziah angin Grassroots Sports Development Programme (GSDP) chu Mizoram hmun hrang hrangah kum 2025-2026 chhungin kalpui tum a ni a, he programme hi sikul naupangte zirlai pangngai tibuai lo tura kalpui tur niin chawlhkar khatah nithum aia tlem lo traning an nei thin ang a, sikul chawlh ah uar zawkin Training hi neiin naupang ten thla 6 chhungin minute 9,000 bawr vel training nei tur a beisei a ni.

GSDP hnuaia Sports Discipline thlan dan hi Olympic Vision Sports leh Popular Sports en kawp chunga thlan niin kum 2025-2026 chhungin Sports discipline pakua (9)-ah hmalak tum a ni a. Archery, Badminton, Boxing, Football, Hockey, Judo, Taekwondo, Weightlifting leh Wrestling zirna atan Mizoram hmun hrangah Centre 46 ruahman a ni.

Sawrkar in ruahmanna a siam ang chuan Serchhip District-ah Archery zirna East Lung-dar-ah Centre pahnih din a ni anga, Football zirna Centre pakhat East Lungdar-ah bawk hian dah tur niin Taekwondo zirna turin Thenzawl-ah Centre pakhat dah a ni ang. Weightlifting zirna turin Serchhip-ah Centre pakhat dah tur niin Wrestling zirna atan Serchhip leh East Lungdar-ah Centre pakhat ve ve dah a ni dawn a. Serchhip District chhunga heng Centre kalpuina tur Middle School te chu thlan fel ni tawhin Centr tinah hian Trainer leh Asst. Trainer pakhat ve ve zel awmin Mizoram pumah Trainer 46 leh Asst. Trainer 46 an awm dawn bawk a ni.