Khualzin dawnsawn zirho

Serchhip-a Tourist Service Provider te tan nimin khan Serchhip DC Pisapui Hall-ah Capacity Building Programme hman a ni.
Tourism Department buatsaiha he hun hman hi he Department Director R. Lalrodingi chuan rawn hmanpuiin Thenzawl Golf Course chu Ministry of DoNER atanga tanpuina sum hmangin International Standard-a siam len tum a nih thu a sawi a. Hei bakah hian khualzinte hip thei tur hmun Serchhip District-ah buatsaih tum a nih thu a sawi bawk a. Khualzin te innghahna ber Hotel leh Home Stay te darkar bi a hman phal a ni lova, sum um luatah dan dik lova kalpui an lo awm tawh thin tih Department lamin hriain chak taka an umzui thin thu a sawi a. “Tihtakzeta hma la peih tan khualzinte lo dawnsawn leh enkawl hi eizawnna tlak a ni a, sawrkar pawhin theihtawpa tanpui a inhuam,” tiin Tourism Sector-ah hian tupawh kan pawimawh vek thu a sawi a, theihtawp chhuah tlang turin a sawm bawk a ni.

He hunah hian Serchhip SDO (S) Rebecca Laldinmawii Hrahsel pawhin tourism hi sum lakluhna tha tak a lo nih tak avangin ram hrang hrangin an ngaipawimawh em em tih a sawi a. Tourism Department pawhin theihtawp chhuahin Serchhip Kawlri tlang-ah pawh Heritage Site changtlung tak a buatsaih mek thu sawiin, Tourism hi thil ho te anga lang, hnamdang laka kan hmel lanna pawimawh tak ni si a ni a, hun lo kal zel tur thlir chungin faina leh thianghlimna kawngah te pawh nasa zawka tan lak a tul thu a sawi a. Social Media hman tangkai nachang hriat a that thu a sawi bakah kan ram tan tih theih tangkai tak kan nei theuh a ni tih hre thar theuh turin he huna kalkhawmte a chah bawk a ni.

Nimin-a he hun hman hi Serchhip SDC Dr. Marilyn Lalruatkimi chuan kaihruaiin Inspector of Statistics Rosie Liannguri leh Tourist Officer C. Ramsangzuali ten thupui thlanbik hmangin zirtirna an pe a. Serchhip-a Khualzin lo dawl thin hrang hrangte leh Branch YMA hrang hranga hruaitute an tel a ni.