ZPM in an Candidate atan Vanlalsailova an puang

Dampa Bialtu MLA Lalrintluanga Sailo chu a boral tak avanga he Bial-a by-election neih turah ZPM party chuan Vanlalsailova chu an Candidate tur a nih thu nimin khan an puang.

ZPM Candidate tur puanna nimin-a ZPM Office-a neih ah an President Lalliansawta chuan “Dampa bial MLA Pu Lalrintluanga Sailo-in hun lo taka chatuan ram min pansan tak avangin a kalsan hmun ruak hnawh khata By-Election neih a lo ngai ta hi a pawi kan ti a. Chutih laiin inthlang ram kan nih anga a hmun ruak hnawhkhat tura inthlan a ngaih avangin August 22, 2025-a Nomination Committee Meeting chuan lungrual takin Pu Vanlalsailova kan thlang ta a ni. Duhsakna kan hlan a, Party mipuite pawh lungrual taka thawk tlang turin kan inngen,” a ti.

He hunah hian Candidate tura puan tak Vanlalsailova pawhin Bialtu zahawm tak Lalrin-tluanga Sailo chu a ui thu sawiin, “Kum 2023 inthlanpui ah ka tling zo ta lova, theihtawpa vil zui duh mah ila Party Headquarters thuchhuak awiha ZPM taka bial vil a rem si lova, chuti chung chung chuan kum 2028 inthlan awm leh atan ka inbuat-saih sauh sauh reng tho a ni. Beisei leh rin aia hmaa inthlan hmachhawn a ngai ta hi a pawi a, Pu Rintluanga’n hmangaih taka a lo enkawl tawh a bial kalsan tak hi kei pawhin duat leh tha taka enkawl zui thei turin ka tan Pathian in kawng min hawnsak ah ka ngai a. Ruling Bial lo ni tawh thin kha kum khat leh thla riat chhung lek Opposition bial kan ni chunga hrehawm kan tihzia kha hre reng ila, ruling Bial nih zui theihna hun remchang lo inherchhuak leh ta hi, lungrual taka Bial hma-ngaihna nen min lo thlawp vek turin Dampa bial mipuite pawh ka sawm nghal che u a ni,” a ti.

Kum 2023-a MLA Inthlanpui-ah khan Vanlalsailova hian thlantlin ni ta Lalrintluanga Sailo hi Vote 292 in a hneh lo a ni.