Mizoram-a Forest (Conservation) Amendment Act hman ve theih turin Assembly-ah pawm a ni

Mizoram Assembly Fur thutkhawm tan ni nimin khan Mizoram-a Forest (Conservation) Amendment Act hmanna tur chu pawm a ni.

Assembly thutkhawm nimin a neih ah hian Environment, Forests & Climate Change Department Minister Lalthansanga Official Resolution putluh, ‘Forest (Conservation) Amendment Act, 2023 (No.15 of 2023) Stands applied to the whole of Mizoram’ tih chu pawm a ni a. Resolution puluttu Minister Lalthansanga chuan he Resolution hi sawrkar hmasaah khan dodal a lo ni tawh tih sawiin, Forest (Conservation) Amendment Act, 2023 chuan Forest (Conservation) Act, 1980 chu siamthat a tum a, a thil tum ber chu India ramngaw leh biodiversity humhalh ruala hmasawnna tluantling neih a ni, a ti.

Inkaihhruaina tharah chuan Exploration leh Survey thenkhat bakah thing 100 thleng kih theihna chu central sawrkara thlen ngai lovin State sawrkar in phalna a pe thei tawh dawn tih Minister chuan sawiin, Forest kaihhnawih project hrang hrangah te State sawrkarin awlsam zawkin thutlukna a siam thei tawh dawn bakah venhimna lam siam pawh a ti awlsam dawn a, ramngaw enkawlna tha zawk neih theihna a ni, a ti.

He dan hnuaiah hian ramngaw leh thing awmna chu a ram zau zawng hmun 3-a thena hmun khat thlenga tihpun tum a nih thu te, chu chu an than chhoh zelna tur kawng nen pawimawhna pek a nih tur thu te, ramngaw enkawl lama hamthatna leh enkawltute eizawnna tihchangtlun te pawh a tel a, hei bakah hian Forest ram Rel kawng emaw, vantlang kawng sawrkarin a enkawl, mihring chenna kalpawhna atana pawimawhte chu hectare point 1 thleng thiah theih a ni a, ram hmasawnna atana pawimawh, kalkawng, Rel kawng leh Transmission Line bakah ram himna chungchanga pawimawh, International Border, Line of Control leh Line of Actual Control atanga kilometre 100-a awm te invenhim nan leh ruhrel pawimawh din nan ram hectare 10 thleng hman tura Forest Land ruahman a nih thu te a sawi bawk a ni.