Mizoram State University Administrative Building Luangmual-ah sak tum a nih thu CM in a sawi

Chief Minister Lalduhoma chuan Mizoram State University din tum mekah Administrative Building chu Luangmual-a sak tum a nih thu sawiin, Mizoram Engineering College chu kum 2026 Academic Year atanga zirna tan tumin thawktu lak an nih dawn thu a sawi bawk.

Govt. Aizawl College in an kum 50 tlin an lawmna hun nimin-a Mualpui-a an Campus hmuna an buatsaih a hmanpuina ah Chief Minister Lalduhoma chuan zirna sang zawk atana sawrkar hmachhawpte sawiin, “Mizoram State University din tumin hma kan la a. Kum 2036 hmaa lo neih fel hman kan tum a. Administrative Building hi Luangmual-a sak kan tum. A bul lo tantu tur thawktu pawh kan la thuaiin a rinawm,” a ti a. Pukpui-a Mizoram Engineering College paawh a taka function-tir an tum thu leh kum 2026 Academic Year atanga zirna tan tumin thawktu thar mi 63 an la dawn tih sawiin, “A hmunhma thawmthat nan tunhnai khan cheng nuai 2541.19 kan sanction bawk,” a ti a. India ramah zirna In tha bik, khawvel huapa mithiam ber ber chherchhuak thin ‘Institute of National Importance’ tia koh kan nei tih pawh sawiin, “Heng zinga Mizoram in kan neih ve NIT Mizoram Campus hi Lengpui-ah kum 2009 khan sak tan a ni a. Forest Clearance nei lo a sak a nih avangin kum 2017-ah hna zawng zawng tihtawp a ni a. cheng vbc. 20 chuang chawi tura tih kan ni zui a. Mizoram tana NIT hlutzia kan hriat avangin kan sawrkar veleh kan umzui nghal a. Central lamah kan lei chawi tur hi ngaihdam kan dil a, cheng vbc. 10 chuang min ngaidam a. A bak kan pek turte chu kan pe vat a, Campus sak hna hi chhunzawm theih a ni leh dawn ta a ni,” tiin, “Mizoram Polytechnic, Lunglei pawh saw, a ram neitute phalna la lova sak a lo ni a. He harsatna pawh hi chinfel kan duh a, hma kan la mek,” a ti bawk.

Chief Minister chuan Assistant Professor ah qualify lo engemaw zat lak an lo nih thu sawiin, “Qualify vek turin sawrkar hian vawi tam tak chance a pe tawh chungin la qualify lo 31 vel an la awm. Tunah hian an zinga 10 vel hi Court-ah an kal a, Court thutlukna hi kan ngaichang mek,” a ti a. Sawrkar hna lak thuah an fimkhur thu pawh tarlangin, “Tunhnaiah NHM hnuaia hnathawktu pawl pakhat chuan sawrkar hna lak thar turah an tana Reservation siam turin sawrkar an ngen a. Nimahsela, lak an nih dan kan han zirchian khan India Danpui kalha lak an lo ni a. Keini’n lo dahnghet ta ila, miin Court-ah min khing se, kan tla sa a ni. Lainatin duhsak em em mah ila an dilnate chu kan ‘Aw’ ngam ta lo a ni,” a ti bawk.

Chief Minister chuan thalaite tan remchang (opportunity) an siam hnem tawh hle tih pawh sawiin, “Nikum ah Casual Teacher 1369 kan la a, Police Constable 259 kan la a, post hniam lam lak thar phei chu a tam tawh lutuk. Tunah pawh Health Worker tam tham tak kan la leh dawn. Officer Recruitment pawh a kal reng a, MPSC calendar saw a khat thin hle,” a ti bawk.

Govt. Aizawl College in kum 50 an tlin lawmna hunah hian Chief Minister chuan he College a thawk te, zirlaite, lo thawk tawh leh zir tawh zawng zawngte lawmpuina a hlan bawk a ni.

Nimin-a kum 50-na lawm Govt. Aizawl College hi kum 1975-ah mi tlawmngaiten dinin, kum 1989-ah sawrkarin a la zui ta a. NEHU hnuaia College langsar tak ni zuiin tunah hian BA, BCom leh MA Education zirna awmin Mizoram sawrkar college zinga zirlai ngah ber an ni a, zirlai 1944 an awm mek a ni.

Govt. Aizawl College Golden Jubilee lawmna hunah hian an Principal Lalbiakzuala chuan inlawmna thu sawiin, an College chanchin tlangpui a tarlang a, Foundation Day-ah hian an College atanga zirchhuak leh College Faculty zinga MLA leh Minister lo ni tawh leh ni mek mi 26  leh Principal lo ni tawh mi 13 te chawimawina an hlan a ni.