Mizoram Secretariat chu e-filing system veka kalpui a ni tawh tih Minister in a sawi

School Education Minister Dr. Vanlalthlana’n Mizoram Secretariat chu e-filing system veka kalpui a ni tawh tih sawiin, Department hrang hrangah pawh Digital veka File kaltir tum ani tih a sawi.

School Education Department hnuaia hnathawk mi 100 te tana ni 4 awh tur ‘Four Day Training on Office Administration’ hawnna nimin-a ATI Auditorium-a neih a hmanpuina ah he thu hi sawiin Education Minister chuan tunlai thiamna hmang thiam turin hmasawn zawng ke pen theuh an mamawh thu a sawi a, Department thawktute chu chak taka hna an thawh theih nan tunlai thiamna kawngah inzir thar tum zel tura chahin, Department chhungah inrelbawlna tha zawk leh felfai zawk a awm theihna atan training buatsaih a nih ang ngeiin Zirtirtute pawhin zirtir hna mai bakah, Office kalphung te, an tih tur leh tih loh tur, dan leh hrai chi hrang hrangte hriat a tul thu te, Budget, Office Administration leh e-Office thlenga hre turin IT lamah pawh tan lak a, hriat vek a tul tawh thu a sawi a. Tunah hian Mizoram Secretariat-ah chuan e-filing system vek a ni tawh tih sawiin, hei hi nakin lawkah Department pawh a la rawn thleng dawn a, Transfer & Posting te pawh digital veka tih a nih tawh dawn avangin heng process thleng hian an hriat a la tul dawn tih a sawi a ni.

He Training hawnna hunah hian ATI Director Rita Lalnunmawii Pachuau chuan inlawmna thu sawiin, School Education Department-a Special Secretary David Lalthantluanga leh Director Angela Zothanpuii te pawhin thu an sawi a ni.