Kolasib DC in ILP pekchhuahna hmun a enfiah

Bairabi leh Phaisen Police Check Gate-a Inner Line Permit (ILP) pekchhuahna leh National Highway-154 a Bairabi leh Tuichhuahen Zero Point kawng siam laite chu nimin khan Kolasib Bawrhsap Robert C. Lalhmangaiha chuan tlawhin Bairabi bul Zophai leh Phaisen-a Mizoram leh Assam State inrina chu enfiah bawk.

Tunhnaiah Assam State atangin Mizoram State chhunga luh tum an thahnem thin hle a. Hemi avang hian Mizoram luhka-a Police Station Check Gate-ah ILP siam hna pawh ngawrh taka kalpui mek a ni a. Hemi kawngah hian Kolasib Bawrhsap chuan Inner Line Permit chu fimkhur zawk leh felfai taka pekchhuak a tul thu sawiin, Bairabi leh Phaisen Police Check Gate te hi a tlawh a. Check Gate-a thawktute chuan Sponsorship nei lo leh Document felfai tak nei lo te chu ILP pekchhuah an nih loh thu sawiin, Bawrhsap chuan Check Gate-a thawktute leh ILP buaipuitute hnathawh chu fakawm a tih thu a sawi a ni.

Kolasib Bawrhsap hian Bairabi Police Station-ah Bairabi a Land Owners' Association hotute be bawkin, NH-154 siam mek a Sawrkar hmalakna chungchangte leh harsatna awmte sutkian dan an sawiho a. He hunah hian Bairabi khawchhunga Double Lane kawng siam hnathawh meka ramneitute'n compensation chungchanga harsatna an tawh chu sawiho niin hmalak dan tur an relho a. Kolasib DC hi Addl. SP F. Lalthlamuana bakah Land Revenue & Settlement Department hotuten an tawiawm a ni.