Serchhip Bawrhsap in PMFME chungchang zau zawka inhrilhhriat tul a tih thu a sawi

Serchhip District Bawrhsap Paul L. Khuma chuan mahni kutkawi-a eizawn tumte tan Pradhan Mantri Formalisation of Micro Food Processing Enterprises (PMFME) chungchang zau zawka inhrilhhriat a tul thu sawiin, he Scheme kaltlanga hamthatna dawngtute hian cheng nuai 10 thleng 35% Credit Link Subsidy an dawng thei a ni.

Pradhan Mantri Formalisation of Micro Food Processing Enterprises (PMFME) hi eitur kaihhnawih sawngbawlna, Micro Food Processing hmun siam duh leh siam mek ten sum leh pai bakah thiamna (technology) leh sumdawn dan kalhmang (business assistance) an thiam theih nan sawrkar laipui-a Ministry of Food Processing Industries hnuaia Scheme a ni a. PMFME chungchang sawihona hi nimin khan Serchhip DC Meeting Hall-ah District Bawrhsap Paul L. Khuma hova neih niin tun thlengin Serchhip District-ah he Scheme hnuaiah loan pekchhuah an awm hriat a la ni lo tih he hunah hian tarlan a ni a. He hun hmanpuitu Bawrhsap Paul L. Khuma chuan PMFM chu mahni kutkawih ngeia eizawn tum te tana Scheme tha leh tangkai a nih avangin he Scheme chungchang hi zau zawka inhrilhriat tul a tih thu a sawi a ni.

He Scheme kaltlanga hamthatna dawngtute hian cheng nuai 10 thleng 35% Credit Link Subsidy an dawng thei a. Chumi awmzia chu an Loan lak (cheng nuai 10 chin)-a a pung (interest) hi Bank kalphung pangngaiin rulh phawt tur a ni a. An rulh zawhah loan rul tha te hnenah an loan atanga za zela 35 chu sawrkar chuan a pelet leh dawn a ni. He loan dil thei tur hian pawl riat (8) pass chin nih a ngai a. Udyam hnuaia inziaklut chhungkua ten loan pakhat zel an dil thei a ni. He loan dilna atana DPR chu District Resource Person ten an siampui dawn a. Self Help Group (SHG) angin loan hi dil theih ni bawkin Member 3 aia tlem lo, mi 10 aia tam loh an nih a ngai thung a ni.

He ruahmanna hnuaiah hian Serchhip District-ah loan lak tuma dil mek mi pali an awm a, an zinga mi pathum te chu North Vanlaiphai khua niin midang pakhat hi Khumtung a ni thung a, Serchhip khawpui chhungah chuan Loan dil hi an la awm lo a ni. PMFME Scheme hi June 29, 2021 khan Prime Minister Narendra Modi chuan a lo tlangzarh tawh a, helam a tui mi te tan a thlawna Training te buatsaih thin a ni bawk.