Assembly Committee ten House-ah Report thehlut

Mizoram Legislative Assembly thutkhawm nimin-a neih ah Assembly Committee peng hrang hrangte chuan Report an pharh.

Nimin a Assembly thutkhawm ah hian Mizoram Legislative Assembly Subject Committee–III Finance Department (Taxation) chungchanga an First Report chu House-ah pharhin, kan ram a Chhiah khawn chungchanga tlakhniamna te, Chhiah khawn tur tam tak hloh avanga mipuiin kan tawrh phah theihna te, Taxation Commissionerate thawmthat a tulnate leh Committee in a ngaihpawimawh hrang hrangte tarlan a ni a. Committee-in recommendation a siam zinga an ngaih pawimawh pakhat chu chu Bakijai/Certificate Officers kuta pending case Rs. 70,61,22,970/- awm thu leh hei hi Department pawhin lo chhinchhiah deuh a pawimawh thu an tarlang a ni.

Nimin-a thutkhawm ah hian Aizawl-Thenzawl-Lunglei World Bank Road chungchanga Mizoram Legislative Assembly-a Committee on Estimates, Second Report (Action Taken Report) chu pharh a ni a, he Report hian he Committee-in information a hmuh leh a taka enfiah a nih hnua Sawrkarin hma a lakna, kawng thawmthat hna (patch repair leh resurfacing) a thawh a record mai bakah, hmalak lehna tura duante a record tel a. Sawrkarin Fur zawha Full Rehabilitation hna a thawh theih hmaa hma la lailawk tura recommendation-te leh mipuite hnena regular taka update siam tura a tihna te a tel bawk a ni.

Assembly Public Accounts Committee (PAC) pawhin nimin vek khan ‘PAC 6th Report on Actions Taken By the Government Against the Recommendations contained in the twelfth Report of the Public Accounts Committee in the Eight Assembly’ chu House-ah an pharh bawk a, Sixth Report of PAC hi CAG audit Report 2018-2019 a para 3.3 a Tourism Department hnuaia State Institute of Hotel Management sakna tura Tourism Department in PWD hnena a hlanchhawn cheng vbc. 8 hmanga a sak tawh building, ‘Idle Expenditure’ ti a Report a lang chungchang ah PAC in Main Report a lo present tawh Department lamin hma an lakna zulzui a Action Taken Report a ni a. PAC Report a tarlan a lo nih tawh danin cheng vbc. 2 chu SIHM hmanrua (equipments) leinan hman a lo nih leh tawh bakah Department in enkawlnan sum engemaw zat a lo hmang tawh a. SIHM building hi outsource tuma Department hmalakna chu Ministry lam remtihna lak kawngah harsatna an neih thu te PAC report ah tarlan a lo ni tawh a ni.

Nimin-a Report an thehluh ah hian PAC chuan hun rei tak Department hmalakna a enpui a, a ngaihchan hnuah Building chhe mai tur leh hmanrua riral mai tur ven nan khawtlang tana hman tangkai anih theih nana Sawrkar in hma la turin a rel thu a awm a ni.