Serchhip College in Annual Day cum Graduation Day hmangin Graduate thar te Certificate hlan an ni

Govt. Serchhip College chuan nimin khan ‘Annual Day cum Graduation Day’ hmangin Serchhip District Bawrhsap Paul L. Khuma chuan hmanpuiin Graduate thar te hnenah Certificate a hlan a. Zirlaite chu tum leh hmathlir nei tura chahin, chumi ti hlawhtling thei tur chuan theihtawp chhuah turin a chah.

Govt. Serchhip College HD Rosanga Multipurpose Hall-a Govt. Serchhip College ten ‘Annual Day cum Graduation Day’ an hman hian Serchhip District Bawrhsap Paul L. Khuma chuan zirlai Graduate thar te a lawmpui thu sawiin, zirna lamah kailawn pawimawh tak an zawhchhuak ta tih a sawi a. An hmalam hunah sawrkar hna hrang hrang, Group A, B, C leh D te thawk thei turin Exam hrang hrang an hmachhawn thei tawh tih sawiin, hetiang an thlen theihna tur atana thawktu an Zirtirtute leh an nu leh pa te hnenah lawmthu sawi turin a chah a. Zirlai kalkhawmte chu tum leh hmathlir (Vision leh Goal) an nei lo a nih chuan nei tura chah bawkin, chumi atan chuan tun atanga bul tan tur leh theihtawp chhuaha inpekna nen hma an lak chuan an hlawhtlin tur thu a sawi a. Hei bakah hian an thil tihna kawng tinrengah Isua Krista chu entawnah nei turin a chah bawk.

Serchhip Bawrhsap chuan he huna kalkhawm zirlaite chu ruihhlo laka fihlim tura chah bawkin, Serchhip District-ah ruihhlo dona kawnga hmalakna kawngah Committee hrang hrang awmin, thawktu hrang hrangte nen hma an lakna ah chanchin tha lem lo a awm fo thin thu a sawi a. Hei vang hian thalaite chu ruihtheih thil chi hrang hrang te an la ti lo a nih chuan ti chhin miah lo tura chahin, an lo ti chhin tawh a nih pawhin sim turin thawktu, mithiam te pan hreh lo turin a chah a. Social Media hman chungchang ah pawh fimkhur a tul thu sawiin, thil mnawi lo zawng phei chu mipuite hmuh theih tura phochhuah aiin hma la theitute hnena thlen nachang hriat a pawimawh thu leh Dan kan hriat a, inthunun theih a tul thu a sawi bawk.

Nimin-a hun hman hi Govt. Serchhip College ten Annual Day an hman hi a tum lina niin Graduation Day an hman tum khatna a ni thung a, he hunah hian College Principal C. Laldintluanga chuan inlawmna thu sawiin, nu leh pa ten an fate chu an kuta an dah ngam avangin lawmawm a tih thu a sawi a. Harsatna hrang hrang paltlanga Graduate ta te chu a lawmpui thu sawiin, an kal zelna turah duhsakna a hlan bawk.

Govt. Serchhip College hi kum 1973 a din niin tunahn hian Subject hrang hrang 13 zir theih a ni a, tun tumah hian Graduate thar mi 77 te hnenah Certificate hlanin lawmman chi hrang hrang semchhuah a ni bawk.