Ni thum chhung lirthei tlan chawlh puan hnuah a pangngaiin lirthei tlan tir leh tan a ni

Sairang leh Kawnpui inkar kawng siam leh tura ni thum (3) chhung chhun lamah lirthei tlan chawlh puan a nih hnuah nizan dar 6:00 atang khan a pangngaia lirthei tlan tir leh tan a ni.

Helai kawngpui chungchanga Single Point of Contact, TBC Lalvenchhunga MLA chuan kawng a that rei theih nan bungraw phur lirthei ten an phur theih chin aia rit an phur tawh lo nan sawrkarin ngaihtuahna a hmang mek tih sawiin, kawng chhiat chhan chu ruahsur vang a nih rualin bungraw phur lirthei ten an phur theih chin aia rit an phur thin vang a ni pakhat tih a sawi a, quintal 90 phur tur pawhin quintal 200 te an phurh avangin kawngin a dawl zo thin lo a, hetiang a thlen tawh loh nan sawrkar chuan ngaihtuahna a hmang mek a, lirthei phurh phal chin pawh khauh zawka kalpui a ngai, a ti a, Ministry of Road Transport and Highways leh Supreme Court-in kenkawh tur a tih ang chu mi State pawhin an kalpui a, Mizoram pawhin a kalpui a ngai tih a sawi.

Adviser to CM TBC. Lalvenchhunga chuan kawng chu a tlachawp a siam mek a nih thu leh lirthei tlan a tam lutuk chuan kawng siamtute hnathawh a tihbuai thin avang leh kawng a chhiat thui chuan khawih leh enkawl a har thin avangin lirthei tlanten kawng siamtute hnathawh an tihbuai lohna turin ni 3 chhung chhun lamah lirthei tlan chawlh an puang tih a sawi a, hetianga an tih zeuh zeuh loh chuan kawng siam ngawt theih a ni tawh lo tih sawiin, hei hi August ni 9 hma zawnga an kalpui dan ang a nih avangin mipui an buai phah lutuk an ring lo tih a sawi bawk.

Kawng chhiat zualna Silchar atanga kilometre 132, New Khamrang hnuai bakah km 129 Mega Food Park bul leh km 125 Kawnpui bulah te a nih thu pawh TBC. Lalvenchhunga chuan sawiin, kawng a khuar chhe leh tawh hle a, lirthei an tang leh tawh tih a sawi a, lung tam tak hmangin hnawh tawh mahse kar khat vel a liam chuan a chhe hman leh thin, a ti a, Fur ruahtui a la tlak reng avangin kawng siam hun a ni rih lova, chuti chung chuan kawng siamthat nan cheng nuai za tel an sen tawh thu leh Working Season-ah chuan tha zawkin an siam theih a rin thu a sawi a ni. 

Lirthei tlan chawlh an puan hian mipuiah nghawng a neih lohna turin ruahmanna dang an siam lo tih pawh sawi bawkin, Sawrkarin lirthei chevel a chhinchhiah danin, Thawhlehni zan khan Kawnpui atanga Aizawl pan bungraw phur engzatmah chhuah an ni lova, Mualkhang/Khamrang atanga Kolasib/Assam lam panin lirthei 530 chhuah a ni thung a, Kawnpui Sairang pengah lirthei 261 leh Sethawn-ah lirthei 340, avaiin lirthei 601 a tangkhang a mek a, nizan dar 6:00 atangin dan pangngaiin kawng hi hawn leh phawt tur a ni a, kawng chin, leh khaw chin azirin repair leh thin a ngai mai thei tih a sawi bawk.