Serchhip District-ah kumin chhungin Rannung seh natna kai hmuhchhuah an tam

Kumin April thla atanga niminpiah, August 19, 2025 thleng khan Serchhip District-ah Rannung Seh natna ti a sawi, Scrub Typhus kai mi 893 zet hmuh an ni tawh a, Sample enfiah atanga za zela 21.43 zet chuan he natna hi kaiin hemi hun chhung hian Typhoid kai pawh mi 567 zet an awm tawh a ni.

Serchhip CMO Office-a Integrated Disease Surveillance Programme (IDSP)-a thawktute chhinchhiahna atanga a lan danin sawrkar kum kal mek, kumin April thla atanga niminpiah, August 19 thleng khan Serchhip District-ah mi 4166 te thisen enfiah atangin rannung seh natna, Scrub Typhus kai mi 893 zet an awm tawh a, Sample enfiah atanga za zela 21.43 te chuan he natna hi kaiin April thla khan Sample enfiah mi 443 zinga mi 102 te chuan an kai a, May thla ah Sample 703 enfiahin mi 131 in an kai leh a, June thla ah Sample enfiah 843 awmin mi 196 in an kai leh bawk a, July thla khan Sample enfiah 1510 awmin heng zingah hian rannung seh natna kai mi 349 zet an awm a, thla kal mekah August ni 19 thlengin Sample 667 enfiah ni tawhin hri kai mi 115 an awm leh tawh bawk a ni.

Sawrkar kum kal mekah hian Serchhip District-ah Typhoid kai pawh an tam tawh viau a, April thla ah Sample 388 enfiah angin mi 41 in an kai a, May thla ah Sample enfiah 705 ah mi 74 in kai lehin June thla ah hri kai 94 chu Sample 770 enfiah atangin hmuh an ni a, July thla ah Sample 1256 enfiahin Typhoid kai 213 lai an awm a, thla kal mekah Sample 568 enfiah tawhin hri kai mi 145 an awm tawh bawk a, sawrkar kum kal mek a Sample enfiah 3687 zingah Typhoid kai 567 awmin Sample enfiah atanga za zela 15.37 te chuan Typhoid hi an kai a ni.

Kumin April atanga August thla chhung hian Thosi seh atanga kai theih natna kai pawh Serchhip District-ah hian hmuhchhuah an awm nual a, April thla atanga niminpiah thleng khan mi 1019 te thisen enfiah atangin Dengue kai mi 67 lai hmuhchhuah awm tawh bawkin a tam zuallai May thla ah mi 29 leh July thla ah mi 23 hmuh an ni.

Malaria hri kai pawh April thla hnu lamah mi 33 lai hmuh ni tawh bawkin hei hi Sample enfiah 2064 atanga hmuh an ni a, thisen enfiah atanga chhutin za zela 1.59 te chuan Malaria hi an kai a, May thla ah Malaria kai hmuhchhuah tam berin mi 13 hmuh an ni a, June thla ah mi 10 hmuhchhuah an awm bawk a ni.