Zirtirtu 320 sawn an ni tawh

School Education Minister Dr. Vanlalthlana chuan January 1, 2024 hnuah Zirtirtu 320 an sawn (transfer) tawh thu a tarlang.

Nimin a Assembly Inkhawm ah MNF Member Lalrinsanga zawhna ziaka chhangin Education Minister Dr. Vanlalthlana chuan January 1, 2024 hnuah Zirtirtu 320 an sawn tawh thu leh Zirtirtu sawnte hi Primary School-ah mi 108, Middle School-ah 105 leh High School-ah 107 an ni tih a sawi a. Zirtirtu sawn te hi a ngheta thawk (regular) 141 bakah Casual Teacher 87 leh Muster Roll (MR) mi 22 te an ni.

Zirtirtu sawn tawh, Primary School-a mi 108 te hi Regular Teacher 60, MR Teacher 22 leh Casual Teacher 26 te an ni a. Middle School a thawk sawn tawh mi 105 te hi Regular Teacher 35 leh Casual Teacher 70 te niin High School-a thawk an sawn tawh mi 107 te hi Regular Teacher 46 leh Casual Teacher 61 te an ni.

Education Minister chuan Hachhek Bialtu MLA Robert Romawia Royte zawhna chhangin Govt. Primary School-ah School wise-in Primary Teacher post siam a ni lo tih a sawi bawk a. School Education Minister-in ‘Teacher mahni post lova awmte 45% an ni’ tih a sawi chung-chang zawhna chhangin, “Teacher mahni post lova awmte 45% an ni a tih te hi Govt. Primary School Teacher te ni lovin Samagra Shiksha Teacher te an ni a, mahni post lova awm tih hian Samagra Teacher te post by post a lak niin an lakna hmun (post) a awm lo te leh Govt. Primary School-a attach te, Office a attach te an ni,” a ti bawk.