Mit pe tura intiam 9231 awm

Mizoram-ah Thih hnua midang tana Mit (eye) pe tura intiam mi 9231 an awm tawh a, Corneal Transplant tawh ti tawh mi 593 an awm bawk.

Civil Hospital, Aizawl (CHA) Eye Bank hotute sawi danin, July ni 12, 2008-ah CHA, Eye Bank chu Eye Bank Association of India-ah register nii, July ni 31, 2008-ah hawn a ni a. Kum 2009 khan Civil Hospital Aizawl, Eye Department leh Sri Sankaradeva Nethralaya (SSN), Guwahati nena tangkawpin September ni 25, 2009 khan Cornea transplant hmasa ber neih a ni a. Tun dinhmunah chuan thih hnua midangte tana Mit pe tura in register mi 9231 an awm tawh a ni.

Hetihlai hian Mitdel mit thlak ngai in-register mi 391 awm tawh bawkin, Corneal Transplant tawh mi 593 an awm bawk a. Hetah hian Mizoram-a transplant tawh bakah SSN, Gauhati a transplant an tih, Mizoram atanga cornea an thawn thlak hmang pawh a tel bawk a. Mit lak tawh zawng zawng tun dinhmunah 1328 awmin, Mit pe tawh hi tun dinhmunah mi 672 an awm tawh bawk a ni.

Eye bank hotute sawi danin, India ramah kum tin Mit darthlalang chhia thlak ngai mi 25,000 atanga 30,000 awm anga chhut a ni a, Eye Bank hi India ramah an in zawm vek avangin cornea hi State dang nen in supply tawn vek a ni a. Mizoram pawh Eye donation kan tih that avangin central hriat te pawh kan hlawh a, India ram State 28 zinga a titha State 15 zingah kan lang a. Mit transplant hi thlak nawn leh te a ngaih thin avangin Mit donate tur hi mamawhna a sang lo thei lo a ni. Mit pe turin kum bithliah awm loin Mit lama harsatna nei tan pawh mit darthlalang a chhiat loh chuan pek theih a nih thu te, midangte tana thih hnua mit pe duh tan inziahluh theih a nih thu leh hriatpuitu erawh an awm a ngaih thu te an sawi a. “Thi hnua Mit pek hian Mit mu zawng zawng lachhuak lovin Mit darthlalang chauh lakchhuah a nih avangin mihring hmel a ti danglam lo a, mitthi chhungte tan pawh hmuh nuam lo engmah a awm lo,” an ti bawk.