Mauchar leh Sakawrdai inkar kawng chhia enfiah

Aizawl District chhunga awm Mauchar leh Sakawrdai inkar kawng chu lirthei kal theih loh khawpa a chhiat avangin he kawngpui in a paltlang khua a chengten harsatna an tawk mek.

Thudawn danin Mauchar hi Aizawl District a awm niin YMA inawpna ah chuan Tuisual Group a ni a. Aizawl lam atanga Sakawrdai panna kawng hi PWD enkawl niin kumin October thla hian Sakawrdai-ah YMA General Conference neih anih dawn avangin Conference palai te tan leh heng laia cheng mipuite tan harsatna a awm loh nan Serlui Group YMA hian hma an la a. Inrinni khan Serlui Group YMA chuan Mauchar leh Sakawrdai inkar kawng National Highway 306A dinhmun hi enfiahin, helai kawng chhe lai hi a rang thei ang bera thawm tha tur leh Contractor pawhin a chan chin kawng chhia chu mipuiten harsatna an tawh zel loh nan siam tha vat se an duhthu an sawi a ni.

Tuirial Lei atanga Mauchar inkar hi KM 10 a thui niin, he Lei atang hian Aizawl District a intan a, Mauchar lam panna KM 6 a thui kawng siam hna thawktu Company chuan an thawh muan avangin kumin June 24 khan hnawthawktu nihna atangin bàn an ni a. Tunah hian re-tender turin ruahmanna a kal mek a ni. Mauchar lam atanga KM 4 a thui hi Contractor thawh tur niin PCC Flooring tur a ni a, Contractor hian khua a chhiat avang leh lirthei a kal hleih theih loh avangin hna an thawk thei lova, an chawl rih a ni.