Mizoram-ah Power-a intodelh tuma hmalak a nih thu P&E Minister in House a hrilh

Power & Electricity Department changtu Minister F. Rodingliana chuan Mizoram-ah Power-a intodelh tuma hmalak a nih thu a sawi.

Nimin-a Assembly Inkhawm ah MNF Member Robert Romawia Royte zawhna ‘Tun Sawrkar hi kum 5 a Sawrkar tlinin Mizoram power-ah kan intodelh dawn em?’ tih ziaka a channa ah P&E Minister F. Rodingliana chuan Intodelh tuma hmalak a ni tih hi a sawi a, Power-a intodelh tura hmalak mekna zawhna pawh chhangin, kawlphetha MWp 10 pechhuak thei tur Thenzawl Solar Plant siam mek a nih thu te; MW 24 pechhuak thei tur Tuirini Small Hydel Project atan hmalak mek a nih thu te; MW 132 pechhuak thei tur Tuivai Hydel Project atan DPR siam mek a nih thu te; PM Surya Ghar ah Central leh State subsidy nen hmalak mek niin tun dinhmunah In 472 hnenah pek tawh niin a Installed Capacity chu MW 1.845 a nih mek thu te a sawi a. Government building hrang hrangah Rooftop Solar (RTS) MW 8.692 dah tura hmalak mek a nih thu te pawh a sawi bawk.

Hydel Project thar siam tum chungchanga MNF Member K. Laldawngliana zawhna pawh chhangin P&E Minister chuan kawlphetha MW 24 pchhuak thei tur Tuirini SHP chu Sesawng ramchhungah siam tum a nih thu a sawi a. Tun dinhmuna hmalakna tarlangin, Externally Aided Projects (EAP) atanga thawh turin Department of Economic Affairs (EAP), Ministry of Finance in approval pe tawhin New Development Bank (NDB) atanga Loan puk tum a nih thu a sawi a. A enkawltu tur Project Monitoring Unit (PMU) chu din tawh a nih thu leh Department lam atangin project hi thawh thuai anih theih nan Department leh NDB te an in dawr mek tih a sawi bawk.

Heng bakah hian P&E Minister chuan P&E Department-ah Provisional Employee (PE) 942 an awm thu leh Power & Electricity Department-ah thawktu (man power) indaihlohna a nasa hle tih a sawi a. “A chhan lian ber chu thawktu (Line Staff) indaihloh vang a ni. Power semchhuahna network system kan tilian tual tual a, hetihlai hian Pension leh Thihna avang ten line Staff kan tlem tial tial bawk a, a thlakna tur thawktu lak belh a awm meuh loh vang a ni,” tiin an Department-ah aikal la an awm hriat a nih loh thu leh aikal la mi 7 ban an nih thu a sawi bawk.