Iskut tharchhuah tlakhniam chhan zirchianna Agriculture Minister in a tlangzarh

Mizoram-a Iskut tharchhuah tlakhniam chhan zirchianna report chu nimin khan Agriculture & Farmers’ Welfare Minister PC. Vanlalruata chuan a Pisa-ah a tlangzarh.

Mission Foundation Movement in Iskut tharchhuahin in tlakhniam lam zel a pan chungchang zirchianna Report an buatsaih tlangzarhna hunah hian Minister PC. Vanlalruata chuan he zirbingna hi a bul tanna tur chauh a la ni tih sawiin, sawrkar chuan Iskut chingtute nen inkawmho a, hmalak chhoh zel dan tur ruahmanna siam a tum thu a sawi a. KVK Selesih chu loneitute tan thil tangkai tak a la ni chho zel dawn tih pawh sawiin, Mizoram sawrkar chuan loneitute tan theihtawp a chhuah zel thu a sawi a, Tung ching tute nen pawh hma an lak mek bakah Intercrooping hmanga Cocoa chin dan an ngaihtuah mek thu a sawi bawk.

Durtlang, Sihphir leh Lungdai-a Iskut thar a lo tlem tial tial nachhan zirchianna hi Ministry of Tribal Affairs, TRI Scheme hnuaiah cheng nuai 25 senga Social Welfare Department kaltlanga thawh a ni a, kum khat (1) chuang he zirchianna hi kalpui a nih thu MFM-a Executive Director Lalramchuanzela chuan a sawi a. Project Coordinator HL Lalrinawma chuan Sihphir, Durtlang leh Lungdai-ah hian Iskut tam tham tak tharchhuah a ni tawh thin a, state pawnah te pawh thawnchhuakin chhungkaw tam takin eizawn nan an hmang thin a. Amaherawhchu, kum 10 kalta vel atang khan Iskut tharchhuah hi a tlem tial tial a, tunhnaiah phei chuan a zuih ral ti tih hial niin a sawi.

He zirbingna in a hmuchhuah zingah hian ram leilung te hi a thur deuh vek a, al a tam a, leiin a tui pai theihna a tlahniam tih tarlan niin, SOC (lei-a thil tawih awm) a tlem tial tial bakah Thlai in an mawhmawh NPK duh khawp an pai loh bakah Rannung in a tichhe nasa hle bawk tih tarlan a ni a. A chhan langsar zual an tarlan zingah Sik leh sa inthlak in a nghawng te; A chinna hmun a awih vang te; Chemical fertilizer an lo hmang nasa tawh a, tihtawp thut a nih vang te; Technical Training mumal an dawn tam tawk loh thu te; Hun rei tak a hmun ngaiah chin thin a ni a, Soil Testing neih loh avangin farmer ten an lei dinhmun an hriatchian loh thu leh Tui an tlakchham thu te tarlan a ni a, rawtna hrang hrang an siam nghal bawk a ni.