Mizoram-a BSNL Exchange ni thinte ‘Online Exam cum Skill Training Centre’ a lehlin remtih a ni

Tunhmaa Mizoram-a BSNL Exchange ni thinte ‘Online Exam cum Skill Training Centre’ a lehlin remtih a ni.

Nimin khan Chief Minister Lalduhoma chuan a Office-ah BSN, NE-1 Telecom Circle-a Chief General Manager Daily Giri-i chu kawmin Mizoram tan telephone Tower tam zawk leh Online Exam Centre tam zawk awm theihna tur leh India ram khawpui thenkhata Mizoram House sak dan tur a sawipui a. Mizoram hmun kilkhawr zawka zirlai leh hna zawng lai ten Online Exam an neih dawnin Aizawl leh District khawpui an pan thin a. He harsatna hi tihnep a nih theih nan tunhmaa BSNL Exchange ni thinte ‘Online Exam cum Skill Training Centre’ a lehlin remti in Mizoram hmun kilkhawr zawkten Internet Signal tha an neih ve theih nan Tower engemaw zat phun belh nise an ti bawk a. Tunah hian BSNL hian Mizoram tan Tower 53 phun belh tur an nei sa a, a phunna tur hmun hi sawrkar ngaihpawimawh hmasak hmunah te phun phawt tur niin a tul angin Tower hi dil belh zel theih a ni.

India ram khawpui danga BSNL rama Mizoram House emaw Hostel emaw, neitu nihna intawm (partnership pattern) hmanga din chungchang pawh he hunah hian an sawi a. A kalpui dan tur hi GAD lamin lo duang se, BSNL nena inbe zel chunga kalpui tur a ni anga. Mizoram Rel kawng leh Rel Station tharte tana Mobile Signal tha chhawpsak chungchang pawh sawiin, Daily Giri-i hian hma an lak mek thu Chief Minister hi a hrilh a ni.

BSNL Chief General Manager Daily Giri hi kumin July ni 10-a Chief Minister leh BSNL Chairman & Managing Director, A. Robert J. Ravi te New Delhi-a an inkawmna bawhzuia lo kal a ni.

Chief Minister Lalduhoma hian nimin vek khan a Office-ah Kaladan Multi-Modal Transit Transport Project (KMMTTP) Zorinpui leh Paletwa inkar thawh mek enkawltu Deputy Project Engineer, Nazish Akhtar kaw,in an harsatnate a ngaihthlak sak a, Nazish Akhtar hian tluang taka hna an thawh mek thu a sawi a. Chutih rualin, an inbunna, ramri atanga hla vak lova Tui, Eng leh Mobile signal tha zawk lakluh an mamawh thu Chief Minister hnenah hian a thlen a. Tuifinriat kaltlanga an bungruate an lakluh theih loh avangin Mizoram kaltlang vekin kan inlalut a, kawng hrang hrangah Mizoram sawrkar thawhpuina an mamawh thu a thlen bawk a. Chief Minister hian an harsatna ah hian a theih ang anga tanpui an nih tur thu a lo hrilh bawk a ni.