Foreign Kuhva ro dona ah chak zawka hmalak tum

Mizoram Kuhva Chingtu Pawl (MKCP) chuan Foreign Kuhva ro dona kawngah chak zawka hma la turin ruahmanna an siam dawn tih an sawi.

Nimin-a thuchhuah an siamah Mizoram Kuhva Chingtu Pawl (MKCP) chuan tunlaia Foreign Kuhva smuggling-a sumdawng an la awm reng chu pawi an tih thu sawiin, Ram leilungfa Kuhva chingtuten an Kuhva tharchhuah hralhna kawngah harsatna an thlen thin tih an sawi a. Kuhva rah thar a hun leh dawn thu sawiin, kuthnathawktu ten harsatna an tawh loh nan Mizoram sawrkar a thuneitu leh Police te pawhin nasa lehzualin hma la se an duhin an beisei tih an sawi a ni.

MKCP chuan tun August thla chhung ngei pawha Police leh Assam Rifles ten hmun thum ngawt a dan lova Foreign Kuhva ro tawlhluh an man thei chu lawmawm an tih thu leh Mizoram Police leh Assam Rifles te rintlak zia leh fakawm zia a takin an hmu nia sawiin, thlamuanthlak an tih thu an sawi a ni. MKCP chuan Foreign Kuhva ro dona kawngah chak zawka hma la turin Hqrs. in ruahmanna a siam dawn tih pawh an thuchhuah ah hian tarlangin, khaw hrang hranga MKCP Branch leh member te chu Foreign Kuhva ro smuggling do turin lo inkau reng turin an chah bawk a ni.