Private Hospital ten Cashless an pawm ngei beisei thu sawi

Health Minister Lalrinpuii chuan Mizoram-a mimal damdawi In (Private Hospital) te'n pawisa pek lawk ngai lo (cashless) hmanga damlo enkawl an la pawm ngei an beisei thu a sawi.

Nimin a Assembly thutkhawm zawhna leh chhanna hunah Member te zawhbelhna chhangin Health Minister Lalrinpuii chuan Mizoram Universal Healthcare Scheme (MUHCS) zawm lo Private Hospital-ah te MUHCS hman theih a nih loh avangin mipuiin sum an sen zat sawrkarin a chhut loh thu House a hrilh a. Mimal damdawi In te'n MUHCS an la zawm loh chhan ni ber lang chu Cashless an duh loh vang nia a lan thu sawiin, “Keini chuan kan policy a ni a, mipuite hamthatna atan cashless ngei kan duh kan ti thung,” a ti a. MUHCS chungchang ah mimal damdawi Inte nen an la inbiak reng thu leh Cashless an la pawm ngei an beisei thu a sawi bawk.

Health Minister sawi danin, tun dinhmunah MUHCS hnuaiah Mizoram sawrkarin damdawi In a pawm (empanelled hospital) Mizoram chhungah 11 leh Day Care pathum awmin, State pawnah chuan Empanelled Hospital 25 a awm a ni. Hei bakah hian Deemed Empanelled Hospital 13 a awm bawk a ni.