Lenkawl

 

 

Serchhip leh Keitum inkar-a NH. 54 kawngpui laihna leivung paih tawlh thla leh chirh in Serchhip Mat Phai Lumtui Zau leh Zawlpui-a harsatna a thlen dan chu nimin khan Serchhip-ah District Bawrhsap Paul L. Khuma hovin sawiho a ni.

Mizoram Teacher Eligibility Test (MTET) Exam chu nimin khan Mizoram-a Exam Centre hrang hranga neih niin Serchhip DIET-ah pawh he Exam hi neih a ni.

Samagra Shiksha Serchhip District chuan nimin khan Teacher Resource Package (TRP) Innovation hnuaiah nimin khan Serchhip District-a Primary School te tan Tablets an sem.

Nimin July 30, 2024 Baptist Church of Mizoram (BCM) hnuaia Thalai Kristian Pawl (TKP) din champha vawi 73-na a ni a, TKP Unit hrang hrang te chuan he ni hi urhsun taka hmanga thupui atan ‘I Pathian tawk turin inpeih rawh’ tih chu hman a ni a. zingkar-ah TKP Unit hrang hrang ten Plastic bawlhhlawh chharkhawm hnatlang neiin zan lama he ni puala inkhawm neih a ni bawk.

Serchhip District-a Veng leh khua 12-ah nimin khan African Swine Fever (ASF) vanga Vawk thi 40 lai chhinchhiah leh an ni a, heng zinga 17 te chu Vawk puitling tawh an ni.

Thenzawl atanga khawthlang lam kawlphetha pekna ah harsatna a awm lohna turin P&E Department chuan chak takin hma an la mek.

ZPM Thalaite chuan nimin khan thuchhuah siamin MNYF hruaitu ten MZP President hlui hova tunhnaia Vairengte-a kuhva bag 2000 dahna an tlawh chu lawmawm an tih thu an tarlang a. “MZP President hlui, MNYF hruaitu ni ta hian MZP President a nih lai khan Kuhva tawlhruk chungchang hi lo vei tawh ni se, Hachhek tlangdunga kuhva chingtuten an kuhva rah hralhchhuahna kawnga harsatna an lo tawh thinte kha a hmunah lo zuk tlawh thin se mipui pawhin tun tuma an kal chhan hi kan fak viau ngei ang,” an ti a. “MNF Ministry-ah Home Minister meuhvin Mizoram Legislative Assembly Session-ah Kuhva tawlhrukna atan GST phuahchawp an siam thu leh kuhva tawlhrukna ah MNF Ministry-in an mit an siai thu a sawite kha mipuiin an la theihnghilh lo,” an ti bawk.

Mizoram Pradesh Youth Congress Committee (MPYCC) chuan nimin July 30, 2024 khan Aizawl-a District Institute of Education & Training (DIET) Principal leh thawktute chênna In (Quarters) tlawhin DIET Quarters-a chêng tur ni lo Chief Minister Lalduhoma Campaigner a awm tih an hmuchhuak tih thuchhuah siamin an tarlang a. MPYCC ten thu an zawhfiahna atanga a lan danin he Quarters-a awm hming tumtu hi Lalthansanga, ZPM Party-a nihna sâng tak PAC Member hial lo ni tawh leh tuna Adviser ni mek a ni tih sawiin, an chhungkaw member zingah sawrkar hnathawk emaw, DIET a thawk emaw sawi tur an awm lo tih an finfiah thu leh Chief Minister Lalduhoma sawipui leh awm tir anih thu an dawng bawk niin an sawi.

Govt. Mamit College chuan nimin khan ‘Freshers cum Graduation Day, 2024’ hmangin Higher & Technical Education Minister Dr. Vanlalthlana chuan khuallian niin a hmanpui a,Mamit chu mi hrang hrang awmkhawmna (cultural diversity) ni mahse inlungrual leh inngeih tlang taka an awm thei chu District dang aia an chungnunna a nih thu a sawi a. Zirna in a tum ber chu mi laktlak chherchhuah a nih thu sawiin, eng hna pawh thawk se tangkai leh rintlak taka thawk turin zirlai pass thar te chu a fuih a. Zirlai tharte chu lehkha chhiar tam tur leh zirlai kaihhnawih ngaithla nasa turin a chah bawk. Govt. Mamit College hi kum 1983 khan din a ni a, kum kalta ah khan pass percentage chu 73.30% niin mi 29 an Graduate a ni. Minister hian amn College hmunhma tlawhin thawktute a kawm nghal bawk a ni.

Rajya Sabha MP K. Vanlalvena leh Chakma Autonomous District Council (CADC)-a Chief Executive Member (CEM) Rasik Mohan Chakma MLA te chuan niminpiah tlai khan Union Home Secretary for Border Managemen, Dr. Rajendra Kumar chu New Delhi-a a Pisa-ah hmuin Bangladesh ramri hrûla chengte hmasawnna tur hrang hrang an sawipui a. Indo-Bangladesh ramri hung pawna mihring chengte chu an chungchang ngaihtuah at?ul thu Union Home Secretary hnenah hian thlenin, Ramri hung chhunga In leh lo dinsak an tul thu te leh kum tam tak kal tawha BRTF te kawngpui siam chuan ngaihsak a hlawh loh avangin sawrkar laipuiin ngaihsak thuai se an duh thu an thlen bawk a. Kum 2021-a Bangla-desh ramri hrula chengte hmasawnna tur project thehluh tawh tun thlenga hmalakna hmuh tur la awm lo chungchang an thlen bawk.

Siaha-a District Transport Officer (DTO) Office chuan chuan thuchhuah siamin nikum August ni 22-a sawrkar in hriattirna a lo tihchhuah tawh angin he thuchhuah siam (Agust 22, 2023) atanga thla 12 hnuah chuan passenger phur lirthei, a bikin Maxi Cab leh Taxi-te an lirtheia Vehicle Location Tracking (VLT) device vuah lo reng reng chu DTO Office Siaha-ah Re-register, Permit issue leh renewal leh Fitness Certificate-ah te hmalak sak leh tih sak theih an ni tawh dawn lo tih an tarlang a. Vehicle Location Tracking (VLT)  an vuah hnuah erawh chuan tih sak theih an ni dawn a ni.

UD&PA Department hnuaia Swachh Bharat Mission (Urban) 2.0 leh Save the Riparian te chuan kumin July thla atanga nakum (2025) July thla thleng atan Faina leh Thianghlimna kawnga Mizoram khawpuiten hma an sawn theihna turin thawhhona thuthlung an ziak.

Champhai District Bawrhsap thar VL. Rem-liana chuan Champhai District chhunga sawrkar Pisa hotute chu nimin khan Champhai DC Conference Hall-ah a kawm a, sawrkar Department te chuan mahni zawnah hmalakna tur theuh nei mah se, hmasawnna lian tham thlen tur chuan Department ten tum thuhmun nei a thawhhona tha an neih a ngaih thu a sawi a. Champhai District chu Aspirational District Programme-ah telh thuai a nih a beiseiawm thu pawh sawiin, District tana hmasawnna tluantling leh chhenfakawm din a nih ngei theih nan an ngaihtuahna seng turin he huna kalkhawmte chu a sawm a ni. He hunah hian Champhai District chhunga sawrkar Pisa hotute telin Department hnathawh, hmachhawp, hmalakna leh thawhho theihna tur ruahmanna hrang hrang te an sawiho bawk a ni.

Mizoram State Project Monitoring Committee (MSPMC) chuan Civil Hospital, Aizawl a Trauma Centre Building sak mek chu nimin khan tlawhin an enfiah. Civil Hospital Aizawl Trauma Centre hi Ministry of H&FW atanga sum hmuh cheng nuai 121.50 leh Mizoram sawrkar (NEDP) sum cheng nuai 450, avaiin cheng vbc. 5.71 senga sak tur a ni a. Nodal & Executing Department hi Directorate of Hospital & Medical Education niin February 17, 2022-ah sak tan a ni a, kumin February 16 khan sak zawh tur ni mah se Covid-19 leh a hmunhma ram buai avangin thawh hun pawhsei (time extension) dil mek a ni a, ruahman dan chuan nakum February 16-ah zofel hman tura hmachhawp mek a ni. He building sak hna hi M/S Parimal Projects, Secunderabad, Telengana ten thawkin za zela 66 zawh a ni tawh a, MSPMC Team hian hna kallai hi uluk taka endikin Resource Base Programme siama chak zawka hna kalpui dan turte a mawhphurtu Department leh Contractor-te hi an sawipui a ni.

Sports Minister Lalnghinglova Hmar chuan nimin khan SAI Stadium, Kokrajhar, Assam-ah ‘Durant Cup 2024, Kokrajhar Chapter’ chu a hawng.

Champhai District chhung Lungphunlian khaw daia Kanghmun kham puk chhungah mihring ruhro thahnem tak hmuhchhuah a ni.

Kolasib District chhung khaw hrang hranga ram neitu kalkhawm te chuan Resolution siamin, Roadside Reserved Forest chhunga chengte dinhmun chu sawrkarin tichiang vat se an duh tih an sawi.

Social Welfare & Tribal Affairs, Women & Child Development Minister Lalrinpuii chuan June 24-29, 2024 chhunga Chandigarh, Punjab-a neih zawh tak 39th Learn to Live Together Camp-a tel Mizo naupang 6 leh anmahni hruaitu mi pahnih bakah Mizoram State Council for Child Welfare Member te chu nimin khan a Pisa-ah a kawm a. He hunah hian Camp-a kal te hian an kalna chanchin leh an thil tawn te sawiin, Camp-ah hian State hrang hrang 18 atangin naupang an kalkhawm a. Item hlimawm tak tak leh naupang tana tangkai tur thil hrang hrang entir a ni a. Mizoram aiawha kalte pawhin item an neih chu lawm a hlawh thu leh Closing function-ah an item chu tih nawntir hial an nih thu an tarlang a ni.

Mizoram District hrang hranga Scheduled Tribe Certificate (Tribal Certificate) pekchhuah dan rualkhai zawka kalpui a nih theih dan tur chu nimin khan Adiviser to Chief Minister (Political) Lalmuanpuia Punte hovin a Pisa-ah sawiho a ni.

Mizoram Police te fitness-ah hma an sawn theih nana hmalakna kal zelah August 5, 2024 khian Mizoram puma mahni awmna theuh-ah Police te chuan a rualin Minute 45 chhung Training Parade hun an hmang dawn a, Home Minister chuan Police-in kuhva an man tawh sa Kudam atanga rukbo a awm lo niin a sawi bawk.

Serchhip District Volleyball Association (SDVA) buatsaih ‘Season Opening Tournament 2024’ chu nimin khan Serchhip Vengchung Volleyball Court-ah khelh tan a ni.

Serchhip District-ah nimin khan ASF vanga Vawk thi 22 chhinchhiah belh leh niin Vawk 50 suat leh a ni bawk.

Govt. Serchhip College chuan kumin a an College-a lut thar te lawmna hun, Fresher Social nimin khan an hmang a, HD Rosanga Multipurpose Hall-a he hun hman ah hian College Principal C. Laldintluanga chu khuallian a ni. Nimin a Fresher Social-ah hian College Principal chuan an College-a zirlai lut thar te chu an lawm tih sawiin, he College-a an kal chhung zawngin activity hrang hrang te tha taka ti turin zirlaite chu a chah a ni. Govt. Serchhip College-ah hian kumin hian zirlai 399 awmin an zinga 153 te 1st Semester an ni.

Mizo Zirlai Pawl (MZP) leh Aizawl District Basketball Association (ADBBA) tangkawp in an buatsaih Inter-College Basketball Tournament 2024 chu nimin khan Aizawl-a Hawla Indoor Stadium-ah khelh tan a ni a, Mizoram-a College leh University 7 atangin Team an tel a, tunkar Zirtawpni-ah zawhfel a ni ang.

Kum 2021 February thlaa hmeichhe naupang, kum 12 pawh la tling lo pawngsualtu a puh Lalpekthanga (32), Thingdawl Vengthar chu Kolasib Fast Track Court Judge, R. Vanlalena chuan nimin khan thiamloh chantirin kum 20 chhung tang tur leh Rs. 7000/- chawi turin a hrem a ni.

Zokhawthar Police-te chuan kar hmasa Ningani khan Immigration Check Post-ah Saphu kawr (Pangolin scale) kg. 10 main Champhai Forest Division-ah an hlan a, a neitu Myanmar lam mi nia hriat Rosiamliana pawh manin thubuai siam sak nghal a ni bawk.

FOCUS District Management Unit, Kolasib District hnuaia Innovation Fund Rs. 30,08,000/- senga Sangha chi siamna khawl din, Ruattei Fish Seed Farm chu nimin khan Agriculture Minister PC. Vanlalruata chuan a hawng a, hetianga Sangha chi siamna hlawhtling tak, puih tlak an awm chu lawmawm a tih thu sawiin, kuthnathawktu zingah an Ban-a sawrkarin a kaih zeuha hlawhtlinna chang thei an awm nual a, a zavai chuan thei lo mah ila a theih chin chinah kan inkaichhuak zel dawn a ni, a ti a. Mizoram-ah eizawnna pui ber chu Agriculture Sector a nih avangin kuthnathawktute chawikan zel chu sawrkarin a tum tih a sawi bawk. He hunah hian Kolasib Bawrhsap Robert C. Lalhmangaiha chu khualzahawm a ni.

NIT Mizoram leh Aizawl Municipal Corporation (AMC) bultuma ni nga awh tur, Tlangram khawpuia bawlhlawh sawngbawl dan chung-chang leh tangkai zawk leh concrete In sakna atana Mau hman a nih theih dan zirhona, 'Economic and Effective Utilisation of Recylcled Waste and Bamboo as a sustainable material in construction' chu nimin khan AMC Auditorium, Thuampui-ah neih tan a ni a, Aizawl Bawrhsap Er. Lalhriatpuia chu khuallian niin NIT Mizoram Diector Prof. S. Sundar leh AMC Councillor K Laltlanzova-te'n hun an hmanpui bawk a ni. He Workshop-ah hian Aizawl Khawpui chhunga Local Council Member, Zirlai, Industry neitu leh AMC hotute telin mithiam hrang hrang- Chief Engineer & Advisor East Delhi Municipal Corporation te, IIT Kharagpur te, Mizoram University leh NIT Mizoram ten hun a hmang dawn a ni.

Mizoram khawchhak lam Champhai District chhunga Pangang puang, Hnah khawr Pangang chu Agriculture Department hmalakna in thunun a ni tawh.

Adviser to Chief Minister (Technical) Er. Ginzalala chuan nimin khan NHIDCL hotute kawmin National Highway 306 leh NH 6-in a paltlang Vairengte leh Kolasib inkara 4-Lane kawngpui siam chungchang a sawipui.

World Hepatitis Day 2024 chu nimin khan hman niin Aizawl-ah chuan Health Minister Lalrinpuii hovin hun hman a ni.

Myanmar ram tualchhung buaina avanga sahimna zawnga raltlan rawn lut Mizoram-ah 35,125 an awm mek nia chhinchhiah a ni a, heng bakah hian Bangladesh atanga raltlan rawn lut 2,014 leh Manipur atanga raltlan rawn lut 4,215 an awm mek nia hriat a ni bawk.

Kum 40 zet hnuah Ex-Mizo National Army (Ex-MNA) Member mi pathum te thubuai neih chu tihfel a ni.

Mizoram sawrkarin sawrkar sum hmanga Project thawh hrang hrangte endik leh vil zui tura a din, Mizoram State Project Monitoring Committee (MSPMC)-in hnathawh an endik tawhah lungawi miah lohna an hmu nual.

Kumin May 28-a Cyclone Remal vanga Mizoram-a vanduaina leh harsatna tawk naupangte hnenah nimin khan chhawmdawlna hlan an ni.

Revenue Minister B. Lalchhanzova chuan tunlai thiamna hmangin Mizo mipuite tana awlsam leh chak zawka hna thawh a ni dawn tih sawiin, Surveyor indaihlohna avanga mipui tawrhna phuhru turin Private Survey Firm te empanel turin hmalak mek anih thu a sawi bawk.

Kumin chhungin Serchhip District-ah African Swine Fever (ASF) vangin Vawk 1753 a thi tawh.

Kumin (2024) kum chanve (January-June) chhung khan Serchhip District-ah naupiang 197 chhinchhiah an ni laiin mitthi 198 chhinchhiah an ni thung a, naupiang chhinchhiah aiin mitthi hi mi pakhat in an tam zawk a ni. Thudawnna in a sawi danin January thla ah naupiang 43 an awm laiin mitthi 46 an awm a; February thla ah naupiang 23 an awm laiin mitthi chhinchhiah 33 an awm bawk a, March thla ah naupiang 30 leh mitthi 33, April thla ah naupiang 32 leh mitthi 26, May thla ah naupiang 34 leh mitthi 40 leh June thla ah naupiang 35 leh mitthi 20 an awm a ni.

Sainik School Chhingchhip-a Local Board of Administration Chairman leh Assam Rifles (East)-a Inspector General Major General Suresh Kumar Bhambhu chuan Zirtawpni khan Chhingchhip-a Sainik School chu tlawhin School Parade Ground a hawn bakah Sainik School Chhingchhip Principal Pisa-a Local Board of Administration thutkhawm vawi 8-na neih chu a kaihruai bawk a. He thutkhawm ah hian Deputy Director, Directorate of School Education, Mizoram; Sub Deputy Commissioner, Serchhip District bakah School naupangte nu leh pa aiawh leh School hotu hrang hrangte an tel a ni. 

Tunhnaia Fur ruahtui tla avanga Lunglei leh Tlabung inkar NH-302 zawh hrehawm zual lai leh lei siamthat ngai lai chu NHIDCL hmalakna in ngawrh taka thawmthat mek a ni.

Mizoram leh Assam ramri buaina chingfel tura hmalakna kal zelah Mizoram leh Assam saworkar aiawhte chuan thla thar August ni 9 khian Aizawl-ah inbiakna neih chhunzawm an tum a, tun tumah hian State pahnih Minister te inbiak vawi 4-na neih tura ruahman a ni.

Chin National Front (CNF) leh Zomi Re-Unification Orga-nisation (ZRO) te chuan remna zawnga inbiakna chu Inrinni khan Aizawl ah an nei.

Assembly Speaker Lalbiakzama chuan Inrinni khan Tam Dil-ah Contour Hedgerow Farming Programme hmanpuiin Mizoram chu tlangram a nih avangin leilung a luangral chak a, lei tha a inchhekkhawm leh har avangin khawvel hmun dang, ram rem leh phaizawlte aiin a let tam takin humhalh a hautak zawk tih a sawi a, Contour Hedgerow Farming hmanga leitha kal ral lo thei ang bera leilung hman tangkail eh chu chu mihring leh nungchate damkhawchhuah nana tih makmawh a ni tih sawiin, mihringte nunna atan chaw tharchhuahna tur leilung mamawh a nih thu a sawi bawk.

MNF Party chuan MNF Ministry-in Mualkhang Bottling Plant siamthat leh tihlenna tura hma a lo lak tawhna kal zelah Bottling Plant lian zawk siamna tur sanction order chu July ni 22, 2024 khan IOCL chuan Mizoram Sawrkar thar kutah a hlan ta tih sawiin, MNF Ministry-in ram mamawh belh ang lei belha lungphum phum mai theiha a lo peihfel vek hnuah Mualkhang Bottling Plant lian zawka siamna tur sanction order a chhuak ta chu lawmawm an tih thu an sawi bawk.

Tunhnai-ah Myanmar atangin Mizoram District 5-ah raltlan mi 1,500 thelh an rawn luh belh leh a, tun dinhmunah Mizoram-ah Myanmar atanga raltlan mi 35,125 an awm mek a ni. Sawrkar hotute sawi danin tunhnaia raltlan rawn lut hi Champhai District-ah tam berin mi 1293 an rawn lut a, Lawngtlai District-ah mi 108 rawn luh belhin Siaha District-ah 77, Serchhip District-ah 14 leh Aizawl District-ah mi pakhat rawn lut anga chhinchhiah a ni.

Mamit SP Lalthangpuii Pulamte leh Mamit District MJA te chuan Inrinni khan an District chhunga Assam ramri, Thinghlun leh Kolalian a Border Outpost-te an tlawh a, thawktute leh khawtlang hruaitute an kawm a ni. Thinghlun Border Outpost-ah hian 4th IR Bn. awmin, Kolalian-ah hian 3rd Bn. MAP an awm a. Heng Border Outpost-ah te hian harsatna liantham sawi tur a awm rih lo a ni.

Durtlang-a Jeriko Khualbuk chuan Zirtawpni khan Mizo Hmeichhe Cabinet Minister hmasa ber Lalrinpuii chawimawina hun an buatsaih a, he hunah hian Minister Lalrinpuii chuan amah chawimawina hun an buatsaih chu lawmawm a tih thu sawiin, Home a awm mekte chu chhantlak an la awm avanga Jeriko khualbuk awm an nih thu a sawi a, nunthar tan leh tura theihtawp an chhuah anih chuan midang zawng zawng thlawh khumin a hmasa berah an la awm theih thu a sawi a ni. Jeriko Khualbuk hi hmeichhe rahbi tleu te awmna niin New Life Home Society te enkawl a ni a. Kum 1990-ah dinin Khualbuk-ah hian puanthui bakah Beauty Culture training kalpui thin niin Principal Councillor hovin thawktu 8 an awm mek a ni.

Mizoram-a damdawi In 9 te chu tehna hrang hranga an teh hnuah hnathawk tha chawimawina NQAS Certificate pek an ni tawh a. NQAS Certificate hmu sawrkar damdawi In te hi Civil Hospital Aizawl leh Lunglei, Aibawk PHC, Thing-sulthliah PHC, Haulawng PHC, Sialhawk PHC, Chawlhhmun UPHC, ITI UPHC leh District Hospital, Champhai te an ni. Damdawi In tha NQAS Certificate hmu tur hian hian District Level, State Level leh National Level atangin tehna hrang hrang paltlang a ngai a, damdawi In tha tehna-ah hian tehfung hrang hrang 2000 chuang a awm a ni.

Hualngo ram People’s Organisation hnuaia Chin Defence Force, (CDF) miten ruihhlo chi hrang hrang an man te chu Inrinni khan Zokhawthar bul, Khawmawi-ah an halral a, he hun hi Cham-phai atangin YMA leh MJA hruaitu ten an telpui a, Methamphetamin mum 55,200; Heroin hawng 291 leh Ganja Kg. chanve halralin a vaiin Rs. 86,55,000 man vel nia chhut a ni.

Lai Autonomous District Council (LADC)-a ZPM MDC pahnih te MDC an nihna hlihsak an nih lohna chhan tur sawifiah tura LADC Chairman-in a hriattir chu High Court-in kaldan pangngaia kal turin thutlukna a siam.

Mizoram Police te chuan Aizawl District Court atanga Rs. 24,87,084 rutu Lalrinngheta (30) s/o Ramngaihsanga, Tuikual 'C' manin thubuai an siamsak.

Ministry of Home Affairs-in Manipur a chi leh chi intihbuaina avanga sahimna zawnga Mizoram-a lokalte tana buhfai pek tura a tih chu buaipui mek a ni.

Social Welfare & Tribal Affairs Minister Lalrinpuii chuan Zirtawpni khan Durtlang-a Home hrang hrang tlawhin Home a awm mek naupangte nen an inkawm a, Home-in harsatna an tawh hrang hrangte a ngaihthlak sak bawk.

Thla thar August 3, 2024 thleng awh tur ‘Tourism Awareness Week 2024’ chu Inrinni khan hman tan a ni a, he Hapta hman chhung hian ‘Tourism for All’ tih thupuiah hmangin Tourism chungchang inzirtirna te, khaw thlan bik te tan intihsiakna leh Talk Show te neiin hun hman a ni ang.

NITI Aayog Governing Council thutkhawm vawi 9-na chu Inrinni khan New Delhi-ah Prime Minister Narendra Modi kaihhruaiin neih a ni a, he thutkhawm ah hian Mizoram atangin Chief Minister Lalduhoma pawh telin Mizoram-ah ‘Viksit Bharat 2047’ a hlawhtlin theihna tur thil pawimawh hrang hrang a thlen.

 

Thla thar August 15-a India Independence Day lo thleng tur chu Serchhip-ah pawh urhsun taka lawm tura ruahman a ni.

Serchhip District-ah kumin chhungin African Swine Fever (ASF) vanga Vawk thi 1688 a thi tawh a, Vawk 4356 suat a ni tawh bawk.

Serchhip Sub-Hqrs. YMA huamchhunga Cyclon Remal avanga chhiatna tawk chhungkaw pathum te hnenah Central YMA in ruahmanna a siam angin nimin khan tanpuina hlan an ni.

Govt. Zirtiri Residential Science College, Aizawl chuan nimin khan Vanapa Hall-ah zirlai thar te lawmna leh zirlai tithate chawimawina hun hmangin Higher & Technical Education Minister Dr. Vanlalthlana chuan khuallian niin a hmanpui a,  Zirtiri College Aizawl Venglai Campus-ah Skill Development Programme chak taka kalpui tum a nih thu a sawi. He College atang hian kumin ah University Topper mi 4 an awm a ni.

Zohnahthlak pawl pahnih, Chin National Front (CNF) leh Zomi Re-Unification Orga-nisation (ZRO) inkara inhmuhthiam lohna thleng avanga ZORO in remna siam tuma hma an lakna kal mekah ZORO in heng pawl pahnih te kawma inremna an duh ve ve nia an hriat avangin Vawiin chhun dar 12:00 hian Adviser to Chief Minister (Political) Lalmuanpuia Punte Room-ah heng pawl pahnih te hian inbiakna an nei dawn.

Sakawrdai khua in nakum October thla-a YMA Inkhawmpui Lian a thlen tur thlirlawkna chu nimin khan Tuivawl Bialtu MLA Lalchhan-dama Ralte hovin Sakawrdai Community Hall-ah neih a ni a, Sakawrdai-a Kohhran, Political Party leh tlawmngai pawl hrang hrang aiawhte bakah Thingsat leh Vaitin atangin khawtlang hruaitute an tel bawk a ni. He Inkhawmpui Lian atan hian Organising Committee dinin vawi 4 an thu tawh a, Sub-Committee 7 din a ni tawh bawk.

Ramchhunga Hospital tha bik tehna, NQAS Certification chu Sialhawk-a Primary Health Centre (PHC) hnenah pek thar leh a ni a, heti hian Mizoram-ah NQAS Certified facility 9 (pakua) a awm ta a ni. Damdawi In tha, NQAS Certificate hmu tur hian hian District Level, State Level leh National Level atangin tehna hrang hrang paltlangin Sialhawk Primary Health Centre (PHC) hian zaa 79 a hmu a, Damdawi In tha tehna-ah hian tehfung hrang hrang 2000 chuang a awm a ni. 

Niminpiah khan Guwahati-a Hotel Vivanta ah ‘Creating an Efficient & Sustainable Water future for North-East India’ tih thupui hmangin ‘North-East Water Conclave’ neih a ni a, he hun hi PHE Minister Prof. Lalnilawma chuan khual zahawm niin a hmanpui a. Indian Chamber of Commerce bultuma he Conclave-ah hian PHE Minister chuan Mizoram-ah Thal laiin tui hna kangchat a tam thin thu leh hemi avang hian mipuiin harsatna an tawh phah thu a sawi a. Tui vanga harstana leh kan boruak sik leh sa inthlak danglam nasa lutuk tih ziaawm nan tuihna leh ramngaw humhalh kawngah tanrual a pawimawh thu a sawi bawk. Prof. Lalnilawma hian Cyclone Remal-in Aizawl khawpui tui pump khawl a tihchhiatte siamtha tura an thawnna hmun pawh tlawh nghalin hawktute chuan tui pump khawl chu hun reilote chhunga siamthat an beisei thu an sawi.

Mizoram Pradesh Congress Committee (MPCC) Vigilance Cell chuan Chief Minister in CBI te General Consent a pek dan nia a sawi chungchang ah thu dik ziktluak lo a awm nia an hriat thu an sawi.

AH&Vety Minister C. Lalsawivunga chuan African Swine Fever (ASF) vanga ran damlo enkawl kawngah Department hnuaia thawktute'n theihtawp an chhuah tlan zel a ngai tih a sawi.

Mizoram-a Common Services Center (CSC) te chuan nimin khan Aizawl-a I&PR Auditorium-ah an din champha kum 15-na an lawm.

Labour, Employment, Skill Development & Entrepreneurship (LESDE) Minister Lalnghinglova Hmar chuan nimin khan Mizoram University (MZU) Incubation Centre hnuaia ‘Entrepreneurship Development Centre’ hawngin, “Kan ram economy chawinunna thisen zunzam chu Entrepreneurship hi a ni,” a ti.

Krishi Vigyan Kendra (KVK) Serchhip District, North Vanlaiphai chuan nimin July 25, 2024 khan 'PM 100 Days Programme on Diversification Programme on Oilseeds during Kharif 2024' pualin North Vanlaiphai-a Badam (Grountnut) chingtute nen Field Day an hmang.

Mizoram Police chhunga Rank hrang hrang a hna thawk tha mi 59 te hnenah Mizoram DGP chuan nimin khan Ati Utkrisht Seva Padak leh Utkrisht Seva Padak chawimawina tangkapui a hlan a, Serchhip District atang pawhin he chawimawina dawng hi an awm a ni.

Chief Minister leh Serchhip bialtu MLA, Lalduhoma chuan Serchhip leh a chhehvel-a Lo leh huan nei (farmers) te tan Community Radio Station din ve theih a nih chuan a tangkai a rin thu a sawi.

Nimin khan Serchhip-ah District Level Committee on Swachhata Green Leaf Rating on Hospitality Facilities chu thukhawmin an hmalakna tur hrang hrang an sawiho.

Serchhip Dinthar Veng leh Serchhip Kawnpui VC Area te chu African Swine Fever (ASF) hri lenna hmunah puan a ni ve leh ta.

Serchhip-a Fisheries Department chuan kar kalta lama Tuikum Cluster-a Sangha chi (note) an sem hnuah nimin khan Serchhip-ah Sangha chi hi an sem a, kumin hian Sangha note hi pakhat Rs. 1/- a khul tir niin Thenzawl leh Hrangturzo Cluster-ah sem leh tur a ni ang.

Mizoram Rural Bank (MRB) Baktawng Branch te hmalakna in nimin khan Chhuanthar Tlangnuam ah sum leh pai leh a enkawl dan chungchang inhrilhhriatna, Financial & Digital Literacy Campaign neih a ni a, MRB Chairman Sheryl L Vanchhong bakah RBI aiawh Pankaja Borah, DGM & OiC NABARD leh Zonunthari, Joint Secretary, Art & Culture ten an hmanpui a ni.

Mizoram sawrkar chuan Mizoram sawrkar hnuaia Contractor hniam ber, Class IV Contractor te hna thawh theih chin a tisang a, a hma lama cheng nuai 50 chin thawk thei khan cheng nuai 250 chin an thawk thei tawh dawn a, a punna hi za zela 400 lai a ni.

Champhai Police-te chuan niminpiah khan Khankawn Police Check Gate leh Zotlang inkar ah Myanmar atanga dan loa kuhva rah phurh bag 420 chu lirthei 8 atangin an man a, heng kuhva rah te hi kg. 28,900-a rit niin Rs.  87,88,500 man nia chhut a ni.

Zokhawthar kaltlanga Myanmar atanga India ram-a bungraw lakluh te chu nimin khan dan tan a ni ta a, Zokhawthar VCP Lalmuanpuia chuan Zokhawthar leh Khawimawi thlunzawmtu Lei chu nimin khan bungraw lut chhuak thei lo tura khar a ni tih sawiin, bungraw kai theihna dang pawh khar a ni bawk a. Engtia rei nge khar a nih dawn tih a hriat loh thu leh mihring veivak tur erawh dan an ni lo tih a sawi bawk.

Mizoram sawrkar in Minister, MLA leh Group 'A' Officer chin te Ration Buhfai dawng thei lo tura hma a lakna, 'Not Entitled for Ration (NER) Card' a kalpui mekah Kolasib DCSO Office ah Group 'A' Officer pahnih in an Family Ration Card an thehlut tawh a, Minister, MLA leh Group 'A' Officer te hian an Ration Card hi Supply Office ah thehlut mahse, pekchhuah leh an ni anga, Document pawimawh atan kawl in, a tulah an hmang leh thei ang. Ration Card ah chuan Sawrkar atanga Supply Buhfai leh thildang la ve theilo turin chhinchhiahna siam sak an ni ang. Ration Card thehluh hun hi tun thla tawp thleng hawn a ni.

Lok Sabha MP Richard Vanlalhmangaiha chuan nimin khan Delhi-ah Civil Aviation Minister Ram Mohan Naidu Kinjarapu chu hmuin Mizoram State mamawh te a thlen a. Mizoram-ah Airport pakhat chiah a awm avanga indaihlohna a nasat thu leh Mizoram hmun hrang hrang atanga a panna kawnga harsatna an tawh nasat thu a sawi a. A bikin Mizoram chhim lama Airport siam chu a tul thu leh a hmunhma vel pawh engemaw chen hmalakna a awm tawh tih a sawi a. Civil Aviation Minister hian a hmunhma a ngaihpawimawh thu sawiin, Airport hmun tur hi a awm thei a nih dawn chuan hmalak a inhuam thu a sawi a ni.

Chhiatrupna thleng palh thei lakah Mizoram dinhmun zirchiang turin Japan International Corporation Agency (JICA) leh National Disaster Management Authority (NDMA)-a mithiam te chuan Mizoram an rawn tlawh a, nimin khan Disaster Management & Rehabilitation Department changtu Minister K.Sapdanga chu a Office-ah kawmin JICA leh India hmarchhak-a State hrang hrang te nen kum 2026 thlenga thawhho dan turte an sawiho a. JICA-te hian Mizoram leh India hmarchhak State hrang hrang ten khuarel chhiatna hrang hrang an tawrhna a lo ziaawm theih nan Technical Support an pe dawn a ni. An cham chhung hian Aizawl leh a chhehvel a khuarel chhiatna/chhiatrupna thlenna hmun hrang hrangte leh hmun himlo laite an tlawh nghal ang.

Indian Oil AOD, State Office-a Chief General Manager (LPG) DP. Vidyarthy chuan nimin khan Chief Minister Lalduhoma hnenah Gas bur thar (composite cylinder) a hlan a. Heng bur a hlan te hi Cabinet Ministers te hman tur niin Chief Minister leh Supply Minister hnenah an hman tur bik an lo pe tawh a ni.

State Task Force for Immunisation (STFI) chu nimin khan thukhawmin Mizoram District hrang hranga hri danna pek (immunisation) kawnga hmalaknate leh programme hlawhtlinpui tawhna te an thlirho.

Union Minister of Information and Broadcasting Aswini Vaishnaw chuan IIMC Aizawl-a Apna Radio Station din thar chu India Act East Policy atana mellung pawimawh tak a nih thu a sawi.

Nimin khan Durtlang North-a ICFAI University-ah ‘International Seminar on Mizo Tobul Chhuina (Tracing the History and Origin of the Mizo People)’ neih a ni a, Art & Culture Minister C. Lalsawivunga chuan a hmanpui a ni.

Parliament thutkhawm neih mekah Mizoram Rajya Sabha MP K. Vanlalvena chuan rampawn atanga Kuhva leh Sawhthing lakluh tihtawp a phut thu a sawi.

Chief Minister Lalduhoma chuan mipui ten rilru thar puin sawrkar thar an siam tawh tih sawiin, “Huaisen takin, langtlang leh huapzo rorelna kalpui hi kan tum tlat a ni,” a ti a. Aikal lak an tihtawp dawn thu pawh sawiin, Non Practicing Allowances (NPA) pawh dan ang taka kal an tum thu a sawi bawk.

PARTY POLITICS LEH CORRUPTION - Rev. Dr. Zaichhawna Hlawndo

Mizo Zirlai Pawl (MZP) Sub-Hqrs. Thenzawl chuan kumin a HSLC leh HSSLC Exam a titha Mizo Zirlaite hnenah nimin khan chawimawina hlanin Supply Minister B. Lalchhanzova chuan he hun hi a hmanpui a ni.

Serchhip District-a Village Council pahnih, Serchhip Chhim Veng leh New Serchhip North VC-a by-election neih tur inbuatsaihna atan nimin khan Draft Electoral Roll tarchuah niin inthlanna neih hun tur erawh State Election Commission (SEC) Mizoram in a hranin a la rawn ruahman dawn a ni.

National Highway-54 laihzauh leh siamthat hna thawh mekah Furpui lo thleng in kawng a tihchhiat leh hemi avanga harsatna thleng te chu nimin khan District Bawrhsap hovin sawiho a ni.

Kumin chhungin Serchhip District-ah African Swine Fever (ASF) vanga Vawk thi 1629 awm tawhin Vawk 4219 suat a ni tawh bawk.

Serchhip District Cricket Association (SEDCA) President nilai HD. Lalhmachhuana (Tutea) S/o HD. Rosanga (L), Serchhip AOC Veng chu nimin zing dar 1:50 khan Lungphuchawl in a boral a, kum 50 mi a ni. Tutea hian a nupui leh a fa pakhat a kalsan a ni.

Serchhip IOC Veng atanga P&E Veng panna kawng, Addl. SP Quarters leh Tlangnuam peng inkar leimin avanga siamthat hna thawh mek chu Vawiin hian hna thawh chhunzawm a ni leh dawn a. Hei vang hian Vawiin, July 25, 2024 zing dar 10:00 atanga chawhnu dar 1:00 chhung hian he kawngah hian lirthei eng chi mah tlan phal a ni dawn lo a ni.

Lawngtlai District chhunga sawrkar Department hrang hranga hotute tan nimin khan Lawngtlai District Legal Service Authority leh District Administration Office, Lawngtlai bultumin July 1, 2024 atanga hman tan The Bharatiya Nyaya Sanhita, 2023 (BNS), The Bharatiya Nagarik Suraksha Sanhita,2023 (BNSS) leh The Bharatiya Sakshya Adhiniyam, 2023 (BSA) chungchang zirhona neih a ni a, he hun hi Lawngtlai DC Cheemala Siva Gopal Reddy IAS chuan hmanpuiin Resource Person atan C. Lalremsanga, Judicial Magistrate 1st Class chu hman a ni.

ZPM Thalaite chuan PWD changtu Minister Vanlalhlana hmalakna a Darlak leh Tuidam inkar kawng siamtha tura chak taka hmalak mek a ni chu lawmawm an tih thu an sawi a. He kawng hi Ministry of Roads Transport & Highway hnuaia mi NH-44A/108 a nih thu sawiin, “He kawng  siam tur hian Contractor atan M/s Gayatri Project Limited te thlan an ni a, hnathawh muan avang leh hna a that tawk loh avangin nikum August 24 khan an Contract tihtawp sak a ni,” an ti a. He kawng a hna thawh tur la awm (balance work) thawh zawhna tur hian estimate siam that a nih thu leh One Time Improvement atan pawh thehluh a nih thu sawiin, hemi nghah chhunga kawng chhe zual siamna atan cheng nuai 101.90 ruahman a nih thu an sawi bawk.

Rural Development Minister Prof. Lalnilawma chuan niminpiah khan Union Minister for Rural Development Shivraj Singh Chouhan leh Jal Shakti changtu Minister CR. Patil te kawmin Mizoram mamawh hrang hrang a thlen a. Mizoram thlai tharte hralhna tha zawk a awm theihna tura hmalakpui tur te, Mizoram tan Centre of Excellence for Mushroom chungchang te, Huan leh zau inkalpawhna tur chungchang leh Saitual District tan a Krishi Vigyan Kendra din sak tur bakah MGNREGA - Cluster Facilitation Project (CFP) hnuaia hnathawkte hlawh la hmuh loh chungchang te a thlen a. Cyclone Remal in Mizoram a tui pump khawl a tihchhiat thu te leh harsatna hrang hrang thleng te chu Jal Shakti changtu Minister hnenah a thlen bawk.

Mamit District chhungah zirna kawnga hmasawnna an neih theih nan District Education Committee chu nimin khan an Chairman leh Mamit DC Jacob Lalawmpuia hovin DC office-ah an thukhawm a, Mamit District chhunga awm tur zirtirtu hmundanga Attach chungchang te, Aikal lak tihtawp chungchangte leh PMJVK hnuaia Sport Complex W. Phaileng leh Mamit Luangpawl-a sak mekte chu State Sport Council te biakrawn a, zirna kawnga hmasawnna atana hman tangkai tel dan zawn nise an ti a, hmasawnna tha zawk a awm theih na'n rawtna hrang hrangte chhawpchhuaha sawiho zui a ni bawk.

Lunglei Municipal Council (LMC) huam-chhunga bawlhhlawh tawih thei lo paih zinga plastic lam chi awm zat leh a chi hrang dinhmun endikna leh zirchianna chu kalpui tan a ni a, he zirchianna hi tun thla ni 29 thlengin neih a ni ang. Kum tina Plastic Waste Annual Report thehluh thin chu zirchianna mumal a awm lo thin nia a lan bakah, vawi khat lek hman chi sarang (single use plastic) thenkhat hman khap a nih tak bawk avangin Ministry of Environment, Forests and Climate Change chuan Solid Waste Management Rules a siam tha a. He dan thar kalpui tur hian Central Pollution Control Board chuan Standard Operating Procedure (SOP) duangin, Mizoram-ah pawh kalpui a ni a. He SOP zulzui hian Urban Local Body pahnih (Aizawl Municipal Corporation & Lunglei Municipal Council) leh Village Council/Gram Panchayat thlan bikahte bawlhhlawh atanga plastic hman dan endikna hi kalpui mek a ni.

Damdawi In bakah Clinic leh Healthcare Facility zawng zawngte Medical Waste sawng-bawlna hmun, Common Bio Medical Waste Treatment Plant chu nimin khan UD&PA Department changtu Minister K. Sapdanga chuan a hawng.

Environment, Forests & Climate Change (EF&CC) Department chuan dan lova Sawkar hmunhma tichhe zawnga Bethlehem Vengthlang mi thenkhatte hmalakna chu an dem thu an sawi.

Mizoram State Board for Wildlife (SBWL) thutkhawm chu Chief Minister Lalduhoma hovin nimin khan neih a ni.

Disaster Management & Rehabilitation Department (DM&R) Aizawl in a chhinchhiah danin, kumin a khuarel chhiatna hrang hrang thleng avangin Aizawl khawpuiah chenna In chhia 1087 a awm.

Information Technology (IT) hmang tangkai Department leh Office te hnena nimin khan ‘Government Online Excellence Awards, 2024’ hlan a ni a, he hun hi Chief Minister Lalduhoma chuan hmanpuiin Serchhip DC Office pawhin lawmman a dawng a ni.

Mizoram-a Village Council 16-a by-election neih tur atan Vawiin hian Electoral Roll ennawn hna thawh tan a ni dawn a, heng VC 16 zingah hian Serchhip-a Village Council pahnih a tel a ni.

Serchhip District-a Vawk hri, African Swine Fever (ASF) leng chuan ziaawm lam ala pan thei tak tak lo niin a lang a, nimin khan ASF vanga Vawk thi 32 lai a awm leh a ni.

Thenzawl leh Chalkhankawn inkar World Bank Road-a leimin thenfai hna chu Vawiin hian PWD ten an thawk chhunzawm leh dawn a, hei vang hian lirthei kaltlang theih hun tur pawh ruahman leh niin zing dar 7:00 atanga chawhma dar 10:00 thleng kawng hi khar a ni anga, Chawhma dar 10:00 atanga chawhma 11:00 thleng kawng hawngin dar 11:00 atanga chawhnu dar 1:00 thleng khar leh a ni ang. Chawhnu dar 1:00 leh dar 2:00 inkar-ah he kawng hi hawngin chawhnu dar 2:00 atanga tlai dar 5:00 thleng khar leh a ni anga, tlai dar 5:00 hnu lamah hi chuan kawng hawn chhunzawm a ni tawh ang.

Thla thar August 15-a India Independence Day lawmna Serchhip-a neih turah khuallian ni turin LAD Minister C. Lalsawivunga chu ruat a ni a, Serchhip-a he ni hman dan tur chungchang hi tunkar Zirtawpni khian ngaihtuah tur a ni ang.

Mizoram Electricity Regulatory Commission (MERC) din thar lawmna chu nimin khan Aijal Club-ah neih niin P&E Minister F. Rodingliana chuan a telpui a, Electricity Act 2003-in a sawi angin Electricity Regulatory Commission chu State ah din ngei a ngaih thu a sawi. Mizoram sawrkar thuchhuak angin nimin, July 23, 2024 atang khan State Commission thar, Mizoram Electricity Regulatory Commission (MERC) hi a ding tan a, kum 2004 atanga Manipur State nena thawhhona Joint Electricity Regulatory Commission (JERC) chu inremna awmsa anga a tawp tak avangin nimin atang khan State mal angin MERC hi a ding tan a ni.

ZPM Party chuan Chief Minister Lalduhoma hmalakna a Mizoram-a khuarel chhiatna tuarte leh kan thenawm ram atanga Mizoram a inhumhimna zawnga lo kal mi 45,000 vel ei tur buhfai leina atan Central sawrkar in cheng vbc. 5 a rawn pe chu lawmawm an tih thu nimin khan thuchhuah siamin an tarlang a, heng mite hi sawrkar chuan a ngaihsak zel dawn tih an tarlang bawk.

Hachhek Constituency Development Committee (HCDC) chuan Hachhek Constituency huamchhunga Darlak leh Tuidam inkar kawng chhe lutuk chu lungawi thlak an tih loh thu sawiin, a chhe lai te a rang lama siamsak turin Mizoram sawrkar chu an ngen a. Tun thla chhung ngeia hmalakna leh siamthat tumna a awm lo a nih chuan a tul anga hmalak an tum thu an sawi bawk.

Indo-Myanmar Border Trade Point, Zo-khawthar-a bungraw lut leh chhuak te chu naktuk, July 25, 2024 atang hian khuahkhirh a ni dawn nia thudawn a ni a, mihring vei vak khuahkhirh tumna leh dan anga bungraw lakluh te erawh dan tumna a awm lo nia thudawn a ni bawk.

Aizawl West-II bialtu MLA leh Sports Minister Lalnghinglova Hmar chuan nimin khan a bial chhunga Sawrkar School-a Zirtirtute chu Vaivakawn-a Cultural Centre cum Auditorium ah a kawm a, Zirtirtu hna chu hna zahawm leh pawimawh tak a nih thu sawiin, zirlaite nun kawng dik kawhhmuh kawng ah hunbi vawn dik ngaih pawimawh hmasak a tul thu a sawi a. Zirlaite harsatna hriatpui turin leh an mamawh ang a kaihruai tur chuan Zirtirtute leh Zirlaite chuan hun an hman ho tam a pawimawh thu a sawi bawk. He hunah hian School hrang hrang atanga Zirtirtute chuan an School dinhmun leh harsatna an neih theuhte sawi zauin hmalakna kalpui dan turte sawiho a ni bawk. He hunah hian Aizawl West-II Bial chhunga University Exam 2023-24 a Topper te hnenah chawimawina hlan an ni bawk.

Mizoram Cooperative Apex Bank Ltd. (MCAB) Board of Directors Meeting chu nimin khan an Chairman Lalnunsanga kaihhruaiin neih a ni a, Mara Autonomous District Council nena MoU an duan chu pawmin, he Memorandum of Understanding-ah hian MADC hnuaia thawk te'n Apex Bank-a Personal Loan, Education Loan leh Housing Loan-te bithliah chin awma an lak theih dan tur te leh MADC a sum awm te chu Apex Bank kaltlang zela khawih a nih dan turte thuthlung fel taka ziah a ni. Apex Bank hian Deposit a dawn atanga Loan a pekchhuah, CD Ratio chu za zelah 79.78% a ni mek a. Tun 1st Quarter-ah khan Loan cheng nuai 4,302.38 an pechhuak a ni. Tunah hian MCAB hian Branch 28 neiin ATM Booth hi 37 an nei bawk.

Aizawl Municipal Corporation (AMC) Ward No. VI-a bye-election neih turah ZPM Party chuan H. Lalremtluanga chu an Candidate tur a nih thu nimin khan Aizawl-ah an party Office-a an puang a, he Ward-a Corporator chu a boral avangin by-election hi neih a ngai dawn a ni. AMC Ward No. VI hian Canmari West, Edenthar leh Hunthar Veng te a huam a, ZPM Vice President W.Chhuanawma chuan he inthlanna neih tura an Candidate tur hi nimin khan puangin an President Lalliansawta chuan Pathian hnena hlanna hun a hmang bawk. ZPM Candidate tur H. Lalremtluanga hi Zirna lamah BA English niin MSACS hnuaiah Outreach Worker, SIPMIU ah Assistant Programme Director leh School ah Vice Principal hna te a lo chelh tawh a ni.

MNF Legal Board chuan Chief Minister Lalduhoma’n a lo tlangaupui tawh ang ngeiin CBI hnenah General Consent pe leh nghal tura ZPM sawrkar an phut thu an sawi.