Kum 2023 MLA Inthlanpui neih zawh takah ZPM in Vote tla za zel-a 37.86 an chang

Mizoram Legislative Assembly Inthlanpui 2023 neih zawh takah Party mal-a Seat la tam ber ZPM chuan Vote tla za zela 37.86 an la a, MLA thlantlin te Vote hmuh zawng zawng belhkhawm atanga chhutin ZPM atanga thlantlin te hian za zela 69.75 an la thung a ni.

Tun tuma Assembly Constituency 40-a inthlanna neih ah khan vote nei mi 8,52,088 awmin, Vote tla (valid vote) 7,01,872 a ni a, vote tla zinga 2,65,755 chu sawkarna siam thei tura hnehna chang ZPM chuan hmuin hei hi Vote tla atanga chhutin 37.86% a tling a. ZPM hian Bial 27-ah hnehna changin Bial panga ah pahnihna an ni. MNF Candidate mi 40-ten tun tum Inthlanpui a vote an hmuh belhkhawm chu 2,46,338 niin hei hi Vote tla zawng zawng atanga chhutin 35.10% a tling a; MNF hian Seat 10 lain Bial 28-ah pahnihna an ni bawk.

BJP candidate mi 23 te chuan tun tum Inthlanpui ah khan Vote 35,524 hmuin hei hi Vote tla zat atanga chhutin 5.05% chauh a ni a, heti chung hian bial pahnih an la thung a. Indian National Congress (INC) Candidate mi 40-te Vote hmuh belhkhawm chu 1,46,113 niin hei hi Vote tla zawng zawng atanga chhutin 20.82% a ni a, bial pakhatah chiah hnehna an chang a ni.

Lalpa Chhiahhlawh Intelkhawm atanga Independent-a inthlan chuh Candidate 21-te'n vote hmuh belhkhawm chu 2,869 niin hei hi Vote tla zawng zawng atanga chhutin 0.4% a ni a; Aam Aadmi Party (AAP) Candidate mi pali in vote 615 (0.09%) an hmu a. Party/Pawl behchhan nei loa ding (Independent Candidate) mi parukte vote hmuh belhkhawm chu 1,880 (0.27%) a ni.

Tarlan tawh thin angin kumin Assembly inthlanpuiah hian INC, MNF leh ZPM Party-te chuan Bial 40-ah Candidate an dah kim a, BJP in Bial 23 chuhin AAP-in Candidate pali an nei a, Lalpa Chhiahhlawh Intelkhawmte atangin Independent Candidate mi 17-te'n bial 21 an chuh a, Party/pawl behchhan nei loa Independent Candidate mi paruk an awm bawk a. Bial 40-ah hian Candidate mi 174 an awm a ni. Candidate te Vote hmuh zawng zawng hi 6,99,094 niin Candidate zinga thlan tur hre lo a NOTA hmettu mi 2,778 an awm bawk.

Election Commission of India (ECI) tarlan danin, Mizoram MLA inthlanpuiah MLA atana thlantlin mi 40-te vote hmuh belhkhawm chu 3,11,707 a ni a. Thlan tlin tâk mi 40-te vote hmuh belh khawm atang chhûtin ZPM atanga thlantlin mi 27-te'n 69.75% (vote 2,17,435) an chang a; MNF atanga thlantlin mi 10-te'n 22.51% (vote 70,172), BJP atanga thlantlin mi pahnihin 4.10% (vote 12,804) leh INC atanga thlantlin pakhatin 3.62% (vote 11,296) an chang bawk.