Serchhip-ah ‘Fimkhurna Hapta’ hawnna neiin hun remchang ah hman chhunzawm a ni dawn

Lirthei leh a kaihhnawiha chetsualna thleng thei laka fimkhur a pawimawh zia inzirtirna Hapta, Fimkhurna  Hapta (Road Safety Week) chu nimin atang khan Mizoram pumah hman a ni a, Serchhip-ah pawh he Hapta hawnna neih a nih hnuah khua in a bumro tak avangin hun remchanga hman chhunzawm tura tih a ni.

Zoram Drivers’ Union (ZDU) buatsaiha he Hapta hman hi Serchhip-ah chuan nimin zing khan District Transport Officer (DTO) PC. Biakrikuma chuan Serchhip Bazar-ah hawngin India ram chu lirthei-a chetsualna thleng tamna hmun a nih avangin sawrkar laipui pawhin Road Safety Council chu National, State leh District Level thlenga siamin a ngaih pawimawh thu a sawi a. Vanduaina thleng tam tak chu Khuarel ni lo leh mihringte kan fimkhur tawk loh avanga thleng a nih thu sawiin, “Kan fimkhur chuan chhiatna tam tak kan tawrh thin hi pumpelh theihna tam tak a awm a ni,” a ti a. Lirthei khalhtute leh lirthei hmangtu ten midang nena intlanpelh chungchang ah te, Motor in a phurh theih tawk aia tam phurh chungchang ah te, lirthei-a intihpalh theihna bungrua phurh thu ah te, midang lirthei inkhalhchhawk tur chungchang ah te leh bungraw phurhna tur chi Motor-a mihring phurh ah te fimkhur a tul thu a sawi a. Lirthei leh a kaihhnawih a Chhiah pek ngai te a hun bituk ang zela pek ngaih pawimawh a tul thu a sawi bawk.


Serchhip DTO chuan Dan in a khap vang pawh ni lo se Motor khalh dawn leh khalh laia Zu leh ruihtheih thil dang ti lo tur leh mahni chhia leh tha hriatna hmang thiam turin lirthei khalhtute chu a chah a, mipui ke-a kal thin te chu lirthei dan hre ve lo zawk an nih avangin an laka fimkhur leh zaidam an zir a tul thu a sawi a. Taxi leh Auto Rickshaw te chu mi in Dan anga an hmang a nih chuan a hmangtu phalna lo chuan passenger dang lak belh loh tur a nih thu pawh sawiin, Driving License nei lo chuan lirthei khalh loh tur a nih thu a sawi a. Signal Light te dik taka kan hmang a nih chuan Traffic Duty ngai mang lo a kan awm theih thu a sawi bawk a ni.

Serchhip-a Fimkhurna Hapta-ah hian ‘Fimkhur la, Nun chhanhim rawh’ tih thupui-ah hmangin a hawnna hun hi ZDU Sub-Hqrs. Serchhip President H. Malsawma chuan a kaihruai a, he Hapta hman chhung hian he Hapta hman puala lirthei-a Flag tar tur chu zawrhchhuah leh tura ruahman a ni a. Amaherawh chu nimin lamah khaw awmdan in a zir tak loh avangin hun remchanga chhunzawm tura tih a ni zui ta thung a ni.

Zoram Drivers Union (ZDU) Sub-Hqrs. Serchhip hi kum 1958 khan din niin tun dinhmunah Member 520 an awm mek a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar