Insawifiah turin hriattir

Kolasib District chhunga National Highway kawngpui, Kawnpui - Khamrang inkar leh Bil-khawthlir - Leitan, Kolasib inkar kawng thawmthat hna thawktu Contractor, Sadguru company chu hna a thawh that loh avangin PWD chuan insawifiah turin Show Cause Notice a pe a. Sr EE, PWD Highway Division-III sawi danin, Sadguru te hian heng kawng an enkawl lai te hi a thawmthat hna an khawih tha duh meuh lova, vawi engemaw zat siam tura tihna lehkha an pek hnuah pawh an thawk duh lo tih sawiin; tunah hian hotu lam atangin thawk tura tihna lehkha pek a nih bakah Show Cause Notice pek mek an nih thu a sawi.

Contract Agreement ang chuan Bilkhaw-thlir leh Kolasib inkar kawng hi nakum (2024) June thla thlenga vil zui tur an nih bakah, Kawnpui leh Khamrang inkar kawng hi kum 2025 thlenga vil zui tur an ni a. Hetihlai hian kawng a chhiat a vil zui leh a chhe lai thawmthat hna hi an thawh that duh loh avangin insawifiah tura hriattirna pek a ni a. Hei bakah hian PWD chuan Khamrang leh Buichali inkar kawngpui thawmthat hna thawktu Ratna Company pawh insawifiah turin hriattirna a pe bawk a, helai kawngpui hi Ratna hian kum 2026 thleng enkawl tura tih nimahse, kawng chhia thawmthat hna an thawh that loh avangin Show Cause Notice hi a pe bawk a ni.