ZPM Legislature Party Leader-ah Serchhip bialtu MLA thlangin naktuk-ah sawrkar lakluh a ni dawn

Mizoram Assembly Inthlanpui neih zawh taka ZPM Ticket-a thlantlin MLA te thukhawm chuan ZPM Legislature Party Leader atan Serchhip Bial atanga thlantlin Lalduhoma chu an thlang a. Lalduhoma hian nimin khan Governor hnenah sawrkar an siam theih thu thlenin naktuk-ah sawrkar thar hi lakluh a ni ang.

Assembly Inthlanpui neih zawh taka ZPM Ticket-a thlantlin MLA te hi nizan hmasa khan ZPM Leader Lalduhoma chenna In-ah thukhawmin ZPM Working President leh Aizawl North-III bial atanga thlantlin K. Sapdanga rawtna angin Mizoram Legislative Assembly 9-na a ZPM Legislature Party leh House Leader atan Serchhip bial atanga thlantlin Lalduhoma chu lungrual takin an pawm a. House Leader thar tura thlan Lalduhoma rawtna angin Deputy Leader atan K. Sapdanga hi lungrual taka pawm a ni bawk.

Nimin khan ZPM Legislature Party Leader tura thlan Lalduhoma hian Governor Dr. Hari Babu Kambhampati chu Raj Bhavan-ah hmuin a kaihhruai ZPM chuan sawrkar an siam theih thu a hrilh a. Governor hian Lalduhoma hi Chief Minister atana a ruatna lehkha lo pein he hunah hian ZPM Working President K. Sapdanga leh MLA Vanlalhlana ten an tawiawm a ni.

Assembly Inthlanpui neih a nih hnua sawrkar thar lakluhna Inkhawm hi naktuk, December 8, 2023 chawhma dar 11:00 hian Raj Bhavan Circular Lawn-ah neih tura ruahman a ni a, hemi ni hian Council of Ministers tur mi 12 te lakluh nghal a ni dawn a. ZPM Legislature Party Leader Lalduhawma chuan thuthar thehdarhtute kawmin karleh Thawhlehni-ah Assembly Session hmasa ber neih a ni dawn thu a sawi bawk.

Lalduhoma chuan Union Home Minister Amit Shah leh External Affairs Minister S. Jai Shankar te nen an inbiak thu pawh sawiin, sawrkar tla ta in raltlan a enkawl te pawh chhunzawm a nih tur thu leh, a aia tha zawk a tih dan a awm chuan ruahmanna an siam chhoh zel tur thu a sawi a. Myanmar atanga raltlan te pawh chhawmdawl thei tura theihtawp an chhuah tur thu a sawi bawk.