Viksit Bharat Sankalp Yatra neih tur atan Governor in District-a hman tur IEC Van a vailiam

Prime Minister Narendra Modi chuan Inrinni khan Mizoram tiamin ramchhung State 5 tan ‘Viksit Bharat Sankalp Yatra’ a tlangzarh a, he hun hi Mizoram atang pawhin Governor hova lo zawm niin sawrkar laipui in hemi atana Information, Education & Communication (IEC) Van a rawn pek chu Governor hian a vailiam bawk.

Sawrkar laipui chuan hmalakna thar ‘Viksit Bharat Sankalp Yatra’ duangin, hemi hnuaiah hian mipui hamthatna tura Central Scheme hrang hrang te chu a dawngtu ten an dawn kim vek theihna turin khaw hrang hrangah kal chilhin, hmun leh hmunah sawrkar Department aiawh ten inhrilhriatna an kalpui mai bakah inziaklut thei ten hamthatna dawng tura an inziahluhna hun siam a ni dawn a. He hmalakna atan hian sawrkar laipui chuan Information, Education & Communication (IEC) Van chu Mizoram tan 17 rawn ruahmanin heng te hi Inrinni khan Mizoram Governor hian MINECO Open Gym bul atangin a vailiam a. Heng Van (lirthei) vailiam a nih hma hian Prime Minister Narendra Modi hoin State panga - Rajasthan, Madhya Pradesh, Chhattisgarh, Telengana leh Mizoram tana ‘Viksit Bharat Sankalp Yatra’ tlangzarhna hun hi hman hmasa niin State 5 te hian an awmhmun atangin an lo chhim a, Prime Minister hian beneficiary thenkhat a kawm bawk a ni. 

Viksit Bharat Sankalp Yatra hi November 15, 2023 atang khan Central Sawrkar chuan kalpui tanin State tinah kalpui mek a ni a, Mizoram leh State dang pali, inthlan hmachhawn te tan erawh hun pawhfan sakin tunah hian heng State-ah te hian kalpui a ni ve leh ta a ni.

Prime Minister hova hun hman zawhfel a nih hnu hian Governor Dr. Hari Babu Kambhampati chuan khaw hrang hranga mipui hamthatna tur (welfare) Scheme hrang hrang inhrilhriatna kalpui tur IEC Van te hi a vailiam a. Aizawl District tan Van 3 leh Lunglei District tan Van 2 ruahman niin, District dang zawngah chuan Van pakhat theuh tirh a ni a. Spare Van leh Recovery Van pakhat ve ve a awm bawk a. Heng District hrang hrangte tana IEC Van ruahman te hi Inrinni khan District hrang hrangah vailiam a ni bawk.

He inhrilhriatna hmalakna hi Inrinni atang khan tanin kumthar January ni 26 thleng a neih tur a ni a. IEC Van ah hian Driver pakhat zel ruahman a ni a. He hmalakna kaltlang hian Rural Scheme hrang hrang - PMJAY, Kisan Cedit Card, Har Ghar Jal - Jal Jeevan Mission, Jan Dhan Yojana, etc. leh Urban Scheme hrang hrang - PM Mudra Loan, AB-PMJAY, Khelo India, etc. te inhrilhriatna leh inziahluhna hun ruahman a ni ang. He hmalakna buaipui tur hian District bakah Block leh Village Level thlengin Committee siam a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni