Ni 6 chhung awh tur Winter Festival 2023 cum Mega Exhibition hawnna Aizawl-ah neih a ni

Mizoram Tourism buatsaih ‘Winter Festival 2023 Cum Mega Exhibition’ chu nimin khan Aizawl-a Lammual-ah neih tan a ni a, Tourism Minister Lalrinpuii chuan hawngin he Festival hi ni ruk (6) chhung hman tur a ni ang.

Nimin-a he Festival hawnna hunah hian Tourism Minister chuan Winter Festival buatsaih a ni chu lawmawm a tih thu sawiin, kan kutchhuak leh kutthem-thiamna te phochhuahna remchang tha tak a nih thu a sawi a. Tourism chu Industry a nih angin eizawnna tha tak a nih thu sawiin, amaherawhchu, khualzin India Hmarchhak tlawhtute atangin Mizoram chuan 0.01% chauh tlawhtu kan nei a, chona min petu nise a duh thu a sawi a. Tourism hnuaia hnathawk zawng zawngte nasa lehzuala tan la turin a sawm bawk. Minister chuan Sawrkar thar an siam atangin thalaite'n eizawnna tluantling an neih theih nan Tourism Industry kaihhnawihah Training buatsaih tum a nih thu pawh sawiin, zin mite enkawlna kawng, Tourist Management lamah pawh hmalak a nih tur thu a sawi a. Kan ram ralmuang leh sik leh sa nuam em em mai chu khawvel huapa kan zawrh thiam a tul thu sawiin, Tourism chu Smokeless Industry a nih angin sik leh sa vawnthat nan pawh a pawimawh hle a, kan ram economy than chhoh zelna tur atana kalkawng pawimawh tak a ni, a ti bawk.

Winter Festival 2023 Cum Mega Exhibition hawnna programme hi Tourism Department changtu Secretary Dr. Lalrozama IAS chuan kaihruaiin inlawmna thu a sawi a, Dr. Lalrinawmi Ralte-in hunserh hmangin V. Lalengmawia, Jt. Secretary, Tourism Department chuan lawmthu a sawi bawk a. He hunah hian Cheraw, Hlado chham, Chheih Zai te bakah Zaipawl, Band leh Solo te ngaihthlak a ni a. A hmunah hian Food Court tiamin Stall hrang hrang 100 siam a ni a. Thil chi hrang hrang- Mizo kutchhuak thiamthil hrang hrangte mipuite lei theih tura phochhuah a ni.

Winter Festival ni ruk (6) awh tur hman chhung hian nitin chawhnu dar 2:00 atanga zan dar 10:00 thleng Programme hrang hrang- zai leh lam te en-a ngaihthlak tur a awm thin dawn a, nizan khan zaithiam tak tak te'n Concert an neih chhunzawm nghal bawk a. He hun hi a tam thei ang berin chhim tum theuh turin Tourism Department chuan mipuite an sawm a ni.