Mizoram Chief Minister thar Lalduhoma’n Chief Minister Pisa a luahlut tan ta

Kum 1987-a Mizoram in State a hmuh hnua Chief Minister 9-na ni tura lakluh tak Lalduhoma chuan Aizawl Zarkawt Mc Donald Hill-a a Pisa thar chu Inrinni khan a luahlut a, Mizoram Kohhran Hruaitu Committee (MKHC) leh Mizoram People's Forum (MPF) OB te bakah Cabinet Minister leh Minister of State te leh a fanau ten an telpui a ni.

Chief Minister Lalduhoma hi K. Lalthawmmawia IAS, Commissioner & Secretary to Chief Minister leh a thawhpuiten lo dawngsawngin a hmasa berin an chenna tur CM Bungalow a fang kual a, chumi hnuah a Office Chamber-ah lutin a Pisa dawhkan-ah a hmasa ber atan Information & Public Relations Department atanga file pawimawh lo kal-ah a hming a ziak a, hemi hnu hian CM Conference Hall-ah Office luahna pual hian hunserh an hmang zui a ni. Chief Minister Lalduhoma chuan, “Pathian leh mipuite zarah sawrkarna kan han kalpui dawn ta a, ka bultanna ni, Office ka luahluh ni-ah Thlarau lama kan Puithiam ten min telpuiin tawngtaina te min neih sak se kan duh a ni,” tiin a Pisa thar luahluh ni-a Puithiamte a sawm chhan a sawi a. Inthlan hma leh a zawh fel hnuah pawh an thawhpui mi tam takten an sawi fo chu ‘Kan sawrkar chuan Pathian hnena lawmthu sawina, sual thupha chawina leh inhlan tharna i nei ang u’ tih a nih thu sawiin, “Hei hi kan rilruah a lian hle a, Pathian awmpuina nen ngeia sawrkarna kalpui kan duh a ni,” a ti bawk.

He hunah hian MPF General Secretary Rev. Lalramliana Pachuau chuan hunserh hmangin Sam 106:3 ‘Rorêlna vawng thate chu an eng a thawl e, Englai pawha fel taka titu nên’ tih thu leh Thufingte 16: 6-7, ‘Zahngaihna leh thutakin khawlohna chu tlenfai a ni a, LALPA tihnain miin sual a kalsan thin. Mi, a awm danin LALPA a tihlawm chuan, A hmêlma nên lam inremin a awmtir thin’ tih thute a chhiar a. “Pathian tihna nena bul kan tan phawt chuan he sawrkar hi a kal sual dawn ngai lova, Lalpa tihna avangin thil dik lo chu i kalsan ngam zel ang u,” tiin a sawm a. “Sawi zung zung lova, thawk mawlh mawlh zawk turin kan beisei che u a ni,” a ti bawk. Sawrkar thar chu MPF aiawhin lawmpuina hlanin, Pathian thuchah tawi a sawi zawh hian urhsun takin Chief Minister leh sawrkar thar tan tawngtaina a nei a ni.

He huna tel te hian an ngaihpawimawh zawng thil hrang hrangte an sawi bawk a, Rev. Zionvarmawia Fanchun, Administrative Secretary, LIKBK in Malsawm tawngtaiin hunserh a khar a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man