Home Minister in Police hmunpui a tlawh

Mizoram sawrkar-a Home Minister K. Sapdanga chuan nimin khan Aizawl Khatla-a Police Headquarters (PHQ) tlawhin Police hotute a kawm a. Mipui in an beisei angte tihhlawhtlin an tum dawn thu a sawi bawk.

Mizoram Police Hqrs. DGP Conference Hall-a Police hotute nen an inkawmna ah hian Home Minister chuan Chief Minister-in ni 100 chhunga an tih turte a puan tawh thu sawiin, “Chief Minister kaihhruaina hnuaiah mipuiin min beiseina angte tihhlawhtlin ngei kan tum dawn,” a ti a, Police hotute chu CM-in ni 100 chhunga tih tur a sawi ah an Department concern awmte ti hlawhtling turin a chah a. Mipui beisei ang chu anmahni mai-a tih hlawhtlin theih a ni lo tih pawh sawiin, “Thawhhona tha tel lo chuan Department-in hma a sawn lo ang. A tuar tur chu mipuite an ni. Mipui himna atana thawk turte kan ni a, mipuiin min en sang. Chuvangin, keimahni vangin mipuite an thla a muang tur a ni,” a ti a. Ruihhlo do kawngah theihtawp an chhuah dawn tih pawh sawiin, “Police-te in thawkrim em em tih ka hria. Misualte hi an fing ve zel a, chuvangin hma kan sawn ve zel a ngai. In laka thupek pe ringawt tur ni lo, thawhpui tur cheu in ka awm a ni,” a ti a. “Engtik lai pawhin in rawtna leh thurawn ka dawngsawng thei reng a ni,” a ti.

Inkawmhona kaihruaitu Mizoram DGP Anil Shukla chuan Police an indaih loh nasat thu sawiin, “Sanction post atangin 33% vel hnawhkhah lohin a awm. Tin, Police Modernisation Scheme-ah state-in 10% pawh kan pek theih loh avangin sum hmuh tur la hmuh loh cheng vbc. 9 vel a awm,” a ti a, Building lamah pawh harsatna an tawh thu a sawi bawk a ni.