Sawhthing leh Hmarcha lei turin inremna ziak

/

Inrinni khan CM Conference Hall-ah Chief Minister Lalduhoma hmaah Staunch Enterprise, Tinsukia, Assam leh Zawlnghak Farmer Producer Company leh Sialkal Farmer Producer Company te chuan Sawhthing metric ton 500 leh hmarcha metric ton 100 leina tur inremna an ziak.

He inremna hi Clover Organic Private Limited, Dedradun buaipuina hnuaia ziah niin Chinmoy Hait, Project Consultant, Project Management Unit, Ministry of Agriculture & Farmers’ Welfare, Govt. of India chuan hriatpuina a ziak a ni. Sawhthing leh hmarcha an inleisakna tur rate hi January, 2024-ah la sawi fel tur a ni a. Loneitute tana a rate tha tur ang zela ruahmanna kalpui an tum thu Sanjay Kumar, Sr. Vice President, Clover Organic Pvt. Ltd, agreement facilitator firm ni bawk chuan an sawi a ni.

Zawlnghak FPC-in Sawhthing leh Hmarcha Mizoram loneitute tharchhuah supply in Sialkal FPC hian Sawhthing chauh an supply thung dawn a, Inremna ziah hi Supplier company pahnih leh Buyer Company pakhat te, facilitator nei leh Ministry of Agriculture & Farmer Welfare aiawhte hriatpuinaa inremna a ni a. Chief Minister Lalduhoma chuan sawrkar policy pawimawh ber pakhat, thlai thartuten man man taka an thlai an hralh theihna tura hma latu company-te chungah lawmthu a sawi a. An inremna anga tha taka insumdawn tawnna an kalpui theih nan duhsakna a hlan a ni.

Comments

Post a Comment

Popular News (Last 30 Days)

SDVA in hruaitu tur thlang

/
Image
Serchhip District Volleyball Association (SD-VA) chuan nimin khan khan Serchhip Kawnpui VC Hall-ah kum 2024-2025 chhunga an Pawl hruaitu tur thlanna an nei a, President-ah K. Tlangthanmawia (Bazar Veng); Sr. Vice President-ah VL. Hruaitluanga (Bazar Veng); Vice President-ah H. Rohmingliana (Chhim Veng); General Secretary-ah Zothansanga (Chhim Veng); Joint Secretary-ah Jerry Lianhming-thanga (Vengchung) leh Zoramthara (Darnam Veng); Treasurer-ah C. Lalhruaitluangi (Chhiah-tlang Kawn Veng) leh Fin. Secretary-ah R. Lalhnehzauva (Vengchung) te thlan an ni.
Kimchang zawkin »

Truck 8-ah Kuhva ro man

/
Nimin zing dar 3:00 vel khan Mizoram Police te leh Central YMA Kumpuan Sub-Committee te chuan Seling daiah Myanmar atanga dan lova rawn lut ni a rin Kuhva ro Trip 8 leh Escort motor pahnih an man. Thudawn danin, Kuhva ro te hi Truck ke 10 nei Motor 8-ah phurh niin Truck vengtu, Escort Motor 2 man tel a ni a, lirthei leh a khalhtu mi 10 te chu manin Seling Police Outpost pek an ni a, heng Kuhva phur Motor te hi Champhai atanga rawn kalin Khawzawl Gate an rawn paltlang nia hriat a ni. Dan lova Kuhva ro a sumdawnna hi a rukin kalpui reng nia a lan avangin Central YMA leh Police te chuan theihtawp chhuahin hma an la zui mek zel a ni.
Kimchang zawkin »