Sawrkar thar-a Minister ten Pisa an luahlut tan

Mzoram sawrkar-a Minister hrang hrangte lakluh an nih hnuah Minister thar te hian nimin khan an Pisa an luahlut a, Pathian hnena inhlanna hun an hmang a ni.

Home Department bakah Urban Development & Poverty Alleviation (UD&PA) Department, Department of Personel & Administrative Reforms (DP&AR) leh Disaster Management & Rehabilitation Department changtu Minister K. Sapdanga chuan MINECO Old Building First Floor (Room no. 101 & 102)-a a Pisa chu luahlutin Sawrkar lama thawhpuite, thenrual tha leh Party lama thawhpuite nena Pisa luahluh leh inhlanna hun hman a ni chu lawmawm a tih thu  a sawi a, he huna tel te chu ram leh mipui rawngbawl kawnga theihtawp chhuah puiah a sawm bawk.

PWD, Transport leh Parliamentary Affairs Department changtu Minister Vanlalhlana chuan MINECO-a a Office (Room No 109 leh 110) chu luahlutin ram leh mipui hmasawnna atana theihtawp a chhuah zel dawn tih a sawi a, Department lian leh pawimawh tak enkawl tura mawhphurhna pek chu chona lian tak a ni dawn tih pawh sawiin, mipui rawngbawlna leh ram siamna kawnga thurawn leh fuihna te a mamawh hle dawn tih a sawi bawk.

LAD, District Council & Minority Affairs, Art & Culture leh AH&Vety Department changtu Minister C. Lalsawivunga pawhin nimin khan MINECO Old building First Floor Room No. 001 & 002-a a Pisa chu luahlutin a mawhphurhna te chu Pathian chakna ringin tha taka hlen zel a tum thu a sawi a. Ram rorelnaah Pathian ram tundin chu an sawrkar thiltum pawimawh berte zinga mi a ni tih sawiin, a enkawl tur Department palite pawh an hnathawh chu mipui leh kuthnathawktute thleng phak ni ngei tura a duh thu a sawi bawk.

Environment, Forests & Climate Change, Sericulture, Fisheries leh Land Resources, Soil & Water Conservation changtu Minister thar Lalthansanga chuan MINECO Block A Ground Floor Room No. 009 & 010-a a Pisa chu luahin a Department enkawl tur pali te chu Department pawimawh tak tak a nih angin Project siam kawngah pawh tanlak nasat a ngai dawn hle tih a sawi a, a Department enkawlna hnuaiah eirukna leh hlemhletna a rem loh tur thu a sawi bawk.

Information & Public Relations Department, School Education Department, Higher & Technical Education Department, Taxation Department leh Information & Communication Technology (ICT) Department changtu Minister Dr. Vanlalthlana chuan nimin khan MINECO Old Building Ground Floor Room No. 011 & 012-a a Pisa chu luahlutin Dr. Vanlalthlana chuan ram rawngbawl hna tawk thei tura Pathian in a hung chhuak chu ropui a tih thu sawiin, Pisa luah luh huna Sawrkar lama a thawhpuite, Party mi leh sa leh chungkhat lainate nena hun hmanho a ni chu lawmawm a tih thu a sawia, hun kalzel turah an thlawpna leh finchhuahna a ngen nghal bawk.

Agriculture, Irrigation & Water Conservation leh Cooperation Department changtu Minister Vanlalruata pawhin nimin khan a Pisa thar luahin inhlanna hun an hmang a, hemi hnu hian Agriculture Department ten lawmpuina leh inhmelhriattirna hun hmang zuiin he hun hi Secretary H. Lianzela chuan a kaihruai a ni.

Health & Family Welfare, Social Welfare & Tribal Affairs, Women & Child Development leh Tourism Department changtu Minister Lalrinpuii pawhin nimin khan MINECO Old Building First Floor-a Room No. 111 & 112 chu luahlutin Minister Lalrinpuii chuan Pathian leh mipuite duhsakna zarah thlantlin-a a awm leh Cabinet Minister dinhmun pawimawh tak a luah chu lawmthu a sawi a. A mawhphurhna te chu Pathian tanpuinain sawrkar hnathawk leh mipui tawiawmna nen tha taka hlenchhuah theih a inbeisei thu a sawi a. A enkawl tur Department pathum te pawh dik leh langtlang taka, thawhhona tha nen, theihtawp chhuah a tum thu a sawi bawk.

Power & Electricity, Commerce & Industries leh Printing & Stationery Department changtu Minister of State F. Rodingliana pawhin MINECO Old Building First Floor (Room no. 103 & 104)-a a Pisa chu luahlutin Pathian leh mipuite zarah ram roreltu pawimawh tak dinhmun a luah tih sawiin, Mizoram hmasawnna atan theihtawp a chhuah dawn tih a sawi bawk.

Food, Civil Supplies & Consumer Affairs leh Land Revenue & Settlement Department changtu Minister of State B. Lalchhanzova chuan MINECO Old Building First Floor (Room no. 107 & 108)-a a Pisa chu nimin khan luahlutin Revenue Minister a nih changchawi a In hmun, lo/ram a hnena tawktarh lo turin hetiang ti thei chin te a chah nghal a, Revenue Minister a nih chhungin a hming emaw, a nupui fanaute hmingin emaw inhmun, lo/ram inches khat pawh an neih thar dawn loh thu Zoram mipuiten lo hriatsak se a duh thu a sawi bawk.

Minister of State for Sports & Youth Services, LESDE, etc. Lalnghinglova Hmar pawhin MINECO Second Floor (Room no. 207 & 208)-a a Pisa chu nimin khan luahlutin Minister dinhmun a chang thei chu lawmawm a tih thu leh Election a thlantlin a nihna chu bultanna chauh a nih thu sawiin, hmabak la awm turah thawhpuite leh mipui tawiawmna a pawimawh thu a sawi a. Tih dan phung pangngai in hna chu thawh theih ve thin tho mahse, ram siamthat hna thawk a danglamna tak taka thlen tur chuan tih takzet a hma lak a tul thu a sawi bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni