Sum inrenchemna kalpui tur Chief Minister Office atanga a hniam ber thlengin kalpui a ni ang - Governor

Mizoram Legislative Assembly 9-na thutkhawm neih mekah nimin khan Mizoram Larsap Dr. Hari Babu Kambampati chuan House-ah thu sawiin, sum inrenchemna kalpui tur chu Chief Minister Office atanga a hniam ber thlengin kalpui a ni ang tih a sawi.

Nimin-a Assembly House-a thu a sawina ah Governor chuan a sawrkarin Ministry thar hnuaia Mizoram hmasawnna leh intodelhna atana hmalak dan tur tlangpui leh a hawi lam te a tarlang a. State sum dinhmun a that loh avangin sum leh paite awmze nei tak leh inren taka hman anih tur thu sawiin, zan khat thilthu a sum dinhmun siamthat thut theih anih loh avangin kum khat emaw chhung tal a mamawh dawn tih a sawi a. Sawrkar thara an ngaihpawimawh tur thil te tarlangin, sawrkar inrelbawlna tha tak hnuaia mipui tana hnathawhte, langtlang leh innghahna tlak siam te, Sector zawng zawngah hmasawnna ngelnghet siam tura hmalakte, thil siamchhuahna Industry Sector lama tan lakte, mitin ban phaka sawrkar hamthatna siamte chhawpchhuah leh mipuite mamawhna zawn zela hmalakte, thalaite tana hamthatna leh hmasawnna buatsaih leh chhehvel boruak, thing leh mau, leilung, nungchate venhim leh humhalh bakah khuarei thlenga chhawr tur leh hlawkpui tur hmasawnna ruhrel dinte ngaihpawimawh anih tur thu a tarlang a ni.

Governor chuan loneitute tan Agriculture leh a kaihhnawih thil tharchhuahte hlawk zawka hralh anih theih nan sum ruahman a ni ang tih sawiin, Sawhthing, Aieng, Hmarcha leh Hmunphiah te chu tun sawrkar kum chhung ngeiin leisak an ni ang tih a sawi a. Sawrkar tharah eirukna leh hlemhletna te na taka do a ni dawn tih sawiin, “Eiru te lakah ngaihnathiamna a awm dawn lo,” a ti a. Eirukna chhui turin Central Bureau of Investigation (CBI) chu chhui phalna, General Consent pawh pek an ni ang tih sawiin, Healthcare chungchangah tichangtlungin huamzau zawkin mitin tana sam that a nih tur thu leh hmunhma leh hmanrua te tun aia changtlung zawkin siam a ni ang tih a sawi bawk.

Tunhnaia General Election kan neih zawh tak, November 7, 2023-ah khan mipui tam tak an tel thu Governor chuan sawiin, Vote tla zat chu za zela 80.43 lai a nih thu leh hei hian Mizoram mipuiten inthlan a hma aiin an ngaihven sawt a, an rualawhna te hriatthiam pui thei ber tura an ngaih, Sawrkar (Ministry) thlan kawngah an mawh-phurhna pawimawh zia te an hre thar nia sawiin, a lawmawm takzet tih a sawi a. MLA thlantlin te lawmpuina leh duhsakna hlanin, a bik takin a vawi khatna atana thlantlin Member 23 te a lawmpui tih a sawi a. State chhung hmun hrang hrang atanga hmeichhe MLA 3 thlantlin chu Mizoram Legislative History-ah a la awm ngai lo a nih thu sawiin, hei hi Mizorama hmeichhiate hlawhtlinna ropui tak a nih thu leh an hlawhtlinna hian State puma hmeichhiate tan phurna thar a pek ngei a rin thu a sawi bawk.

Inthlanna zalen leh felfai tak kan neih lehna kawngah Sawrkar hnathawkte, a bikin dan leh thupek kengkawhtute inpekna te bakah NGO leh Kohhran leh mipuite thlawpna a ropui tih Governor chuan a sawi a. Mizoram People’s Forum (MPF) in hna an thawk tha tih pawh sawiin, “He Inthlan result hian mipuiten System thar - ‘Kalphung Thar’ an duh a ni tih a tilang a, Democracy kalphung inthlak danglamna kawngah kan mipuite rinna nghet tak a lantir,” a ti bawk.

Nimin-a Assembly thutkhawm ah hian ZPM Member Lt. Col. Clement Lalhmingthanga chuan Governor thusawi chungchanga lawmthu sawina Motion chu House-ah a pulut a, he Motion hi Vawiin hian sawiho in pass tum a ni dawn a. Mizoram Legislative Assembly thutkhawm neih mek hi Vawiin a chhunzawm a nih hnuah zawhfel a ni dawn a ni.