Sawrkar leh tlaka min ngaih theih nan tlak huamin hna kan thawk dawn - Lalduhoma

ZPM Leader leh Chief Minister Lalduhoma chuan ni 100 chhunga an tihtur an puan te khawng takin an kalpui dawn tih sawiin, “Ram mipuiin min enchhin a, min enchhin zel turin kan duh. Kan hnathawh atangin mipuiin min endik se, sawrkar leh tlaka min ngaih theih nan tlak huamin hna kan thawk dawn,” a ti.

ZPM Party in nimin-a Aizawl-a an Office-a Chhung Inkhawm an neih ah ZPM Leader Lalduhoma chuan inthlan neih zawh takah a beisei aia tlem an tling nia sawiin, “Kan tlin lohna tam tak chu sum leh pai vang a ni. Sawrkar siamtu ni mah ila sum leh pai hmangin vote kan zawng ve dawn lo,” a ti a. A bikin Minority Area lamah an tling mumal lo tih sawiin, “Ram puma rual taka mipui kan kal tlan theih nan thianghlim takin hma kan la ang,” a ti a. “Chief Minister-in Works Department a chang lo ang kan ti a, Works Department ka chang lova, bial tin ka enkawlpui vek zawk dawn a ni,” a ti a. “Kan dinhmun hi Pathian remruat, kan tawngtai chhanna a ni a. Mipui, neutral-te avangin hnehna kan chang a. Neutral an tam poh leh ram a kal tha dawn a, party ruihchilhna hi kan kalsan tial tial a ngai. Keini ZPM te hian mipui beng kan tithlep tur a ni lo. Keinin mipui kan tih beidawn chuan Zoram mipuite hian beisei tur dang an nei tawh lovang,” a ti bawk.

Bial tin in Minister an duh vek thu pawh Chief Minister chuan sawiin, “Minister bial nih chak hi thil awmdan an hriat tawk loh vang a ni. Mipui sawrkarah chuan Minister leh MLA an inthlau vak dawn lova. MLA-ten Department an enkawl dawn loh avangin bial tan leh ram mipui tan theihtawpin an thawk thei zawk dawn a ni,” tiin MLA taima tak bial nih a hlawk ber zawk dawn tih a sawi bawk.

Chief Minister chuan Term hmasa ah an MLA ten tha takin hna an thawk tih sawiin, “An hlimthlaah tunah hian kan awm mek a. Kalphung tharah chuan eng hna pawh a tha hle tur a ni. Mipuiten min thlir reng a, ti beidawngtu kan ni thiang lo. Kan hotute kaltlanga min hunna theuh ah mipui beiseina tha theihtawpa kan chhan a ngai. Ram rorelnaa Pathian ram a taka thleng turin kan inbuatsaih a ni,” a ti bawk.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni