Kumin January - November thla chhungin Mizoram-ah Heroin kg. 142 chuang man a ni

Kumin-a thla 11 chhung, January leh November thla inkar chhung khan Mizoram Excise and Narcotics Department leh Police te chuan Heroin kg. 142 leh gram 496 manin Methamphetamine kg. 247 leh gram 54 an man bawk.

Heng Department pahnih hotute sawi danin Excise and Narcotics Department hian kumin a thla 11 chhung hian Heroin kg. 76.219 manin Police hian kg 66.277 an man a, Excise and Narcotics Department hian Methamphetamine kg 103 leh gram 382 manin Police-in kg 143 leh gram 672 an man bawk a ni. Police-te hian Heroin kg khat man hi cheng nuai 30 hu-in an chhut a, Methamphetamine kg khat hi cheng nuai 13 hu leh Crystal Meth erawh chu kg khat cheng vbc. 3 hu-in an chhut a ni.

Police hian January leh November inkar chhung khan Heroin kaihhnawihah thubuai 220 ziaklutin mi 305 an man a. Methamphetamine kaihhnawihah thubuai 15 an ziak lut a, mi 22 an man bawk. Tunhnaia ruihhlo tawlh a hluar tak em em chhan leh dan kengkawhtute’n ruihhlo an man a tam chhoh thut tak chhan hi kum 2021 February a Myanmar a sipaiin mipui thlan sawrkar paihthla a thuneihna an chhuh luih vang niin sawi a ni a. A bik takin Mizoram depa awm Chin State-ah hian sawrkar mumal a awm thei ta lova, chumi denchhen chuan ruihhlo tawlhtute an huangtau ta hle ni a hriat a ni.

Hetihlai hian Delhi khawpui a Nigerian pakhat bo chungchang chhui chiang turin Mizoram DGP Anil Shukla chuan IGP (Intelligence) Veenu Bansal a ruat a. Thulakna in a tarlan danin kumin October thla a Mizoram-a Methamphetamine tam tham tak man chungchangah mi 4 man niin Delhi lam nena inthlunzawm ni a hriain SP (Narcotics) Shankar Choudhary hovin Mizoram Anti-Narcotics Task Force Team tirh a ni a. Anni hian Myanmar mi 2 Delhi-ah manin Nigerian pakhat chu damdaw In-a enkawl a nih laiin Shankar Choudhary hian manin a tlanchhuah nan cheng nuai 35 an pek thu leh cheng nuai 20 dang a dil belh ni a puhin he Nigerian farnu hian Delhi Police Control Room a hrilh a. Hemi hnu hian Nigerian pa hi nasa taka zawn a nih bakah a chhui chiang tur ruat an ni a, a chhui chiangtute chuan IPS Officer Shankar Choudhary hian he Nigerian hi a man ngei ni a an hriat thu an sawi a, a awmna erawh chu an hre lo niin an sawi a. Shankar Choudhary leh Mizoram Police Team-te an lo haw hnu hian Delhi Police lamin an buaipui zui avang leh puhna a awm avangin DGP chuan chhui chiang turin IGP Veenu Bansal hi a ruat ta a ni.

Comments

Popular News (Last 30 Days)

LPG man bithliah thar