Kumin ah Grape Wine siamchhuak hnem tawh

Champhai Winery atangin kumin, 2023-ah Grape Wine (Champ Wine) Case 4,360 siamchhuah tawh a ni a, Winery-ah hian Wine-a la siam loh litre 2,50,000 a la awm mek bawk.

Champhai Grape Growers’ Society hruaitute sawi danin, Grape atanga siamchhuah Grape Wine-te chu sawrkar ruahmanna anga zawrh chhuah phal a nih hnuah Mizoram hmun hrang hrangah zawrh chhuah mek zel a ni a. Mizoram pumah Grape Wine zawrh phalna mi 48 hnenah pek an ni a, District mala phalna pek tam berna Aizawl bikah mi 19 hnenah pek an awm a ni.

Mizoram-a Winery pahnih, Champhai leh Hnahlan Winery atanga Wine siamchhuahte hi sawrkar thupek angin Alcohol content 12% aia sang lo tur niin Hnahlan Winery atanga siamchuah, Isabella chu um khat (750ml) chu Rs. 500 a ni a, Champhai Winery-a siamchhuah ‘Champ Wine’ chu um khat Rs. 300 a ni thung a. Mizoram sawrkar chuan Grape wine litre khatah Excise Duty Rs. 10 leh VAT 16% a la mek a ni.

Horticulture Department chhinchhiah danin nikum 2022 chhung khan Hnahlan hian Grape quintal 1,500 tharin Rs. 90,00,000 an lei chhuak a, Champhai leh a chhehvela lo neitu ten quintal 1,244.88 thar bawkin, Rs. 68,69,899 an lei chhuak bawk. Winery atanga siamchhuah Grape Wine-te hi Mizoram Baptist Kohhran leh Kohhran dang thenkhat ten Sacrament atan an dawr mek a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni