Serchhip District-a Viksit Bharat Sankalp Yatra kalpui dan tur Bawrhsap hovin ngaihtuah a ni

Nimin khan Serchhip-ah District Bawrhsap David Lalthantluanga hovin Serchhip District a Viksit Bharat Sankalp Yatra kalpui dan tur ngaihtuah a ni a, he hunah hian Serchhip District-a Sawrkar Laipui scheme kalpuitu Department te an tel a ni.
Sawrkar laipui chuan India ram leh a chhunga cheng mipuite hmasawnna turin State Sawrkar te kaltlangin Scheme hrang hrang a kalpui mek a. Heng Scheme a kalpui te hi a tak taka chhawrtu tur leh tangkaipui ber tur mipui mimirin chiang zawka an hriat a, anmahni leh an chhungkaw tana tangkai taka an hman ve ngei theihna tura mahni tawng ngeia inzirtir leh inhrilhriat chu Sawrkar Laipui chuan a ngai pawimawh hle a. Hemi atan hian Viksit Bharat Sankalp Yatra hi November 15, 2023 atang khan Sawrkar laipui chuan kalpui tanin State tinah kalpui chhoh mek a ni tawh a. Mizoram leh State dang pali, inthlan hmachhawn te tan erawh hun pawhsei niin Mizoram State hian December ni 14, 2023 hian State Level-ah a hawnna neiin a kalpui tan dawn a ni.


Viksit Bharat Sankalp Yatra atan hian Serchhip District-ah Van pakhat tirh a ni anga, he lirthei (Van) hi a bika ruahman niin State pawn atanga rawn tirh tur a ni dawn a, December ni 18, 2023 atanga zin chhuak tanin Serchhip District chhung khaw hrang hrang a fang dawn a. Heng khuaah te hian Inkhawm buatsaihin Sawrkar Official te leh Scheme kaihhnawiha mi pawimawh ten mipuite zirtirna hun an hmang thin dawn a. Welfare Scheme dawng thei (eligible) si, la inziaklut lote hnenah inhrilhfiah a ni anga, sawrkar laipuiin a duan anga ziahluhna hun siam leh beneficiary-te nena inkawm te pawh a kengtel a ni. Nimin-a District Bawrhsap hova Meeting hian ruahmanna duangin December ni 18, 2023 atanga tanin January 26, 2024 thleng he Van hi a zin kual dawn a.

Serchhip District-a Viksit Bharat Sankalp Yatra Nodal Officer atan hian SDO (Sadar) Rebecca Laldinmawii Hrahsel chu ruat a ni a. Block Level-ah Nodal Officer atan Serchhip RD Block-a Serchhip BDO leh East Lungdar RD Block-ah East Lungdar BDO te ruat an ni a. Central Scheme kalpuitu Department tin ten an Department atangin a khawihtu tur bik Officer an inruat theuh dawn bawk a ni. Hei bakah hian Village Level-ah Committee din tur tih a nih angin Block Level Nodal Officer te kaihhruaiin Village Level Committee hi din a ni bawk ang.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni