Home Minister in Mizoram khawchhak lam District pathum tlawhin sawrkar hotute a kawm

Home Minister K. Sapdanga chuan nimin khan Saitual, Khawzawl leh Champhai District te tlawhin Mizoram khawchhak lam chu thil tha tam tak chhuahna a nih rualin, ruihhlo leh dan phalloh thil te luhna kawng lian ber a ni mek chu pawi a tih thu a sawi.

Home Minister K. Sapdanga hian zan hnih riak turin nimin tlai khan Champhai hi thlengin Champhai Circuit House-ah sawrkar department hotute nen an inkawm a, he hunah hian Home Minister chuan Mizoram sawrkar chu ram siamtha turin thahnem a ngai a, theihtawp a chhuah dawn tih sawiin, Mipui ten sawrkar ngenna ngaipawimawha kawtchhuah-a inhmuah leh inzawn an ti lo chu lawmthu a sawi a. Mizoram khawchhak lam chu thil tha tam tak chhuahna a nih rualin, ruihhlo leh dan phal loh thil te luhna kawng lian ber a ni mek chu pawi a tih thu sawiin, Ruihhlo leh dan phal loh thil tawlhruk dona kawngah sawrkarin theihtawp a chhuah dawn tih a sawi a, sawrkar tha chakna mai ni lo, khawtlang tha chakna hmanga do a ngai tih a sawi a. Mizoram run mektu ruihhlo leh dan phal loh thil danchah kawngah Department hotute tawiawmna leh thawhpuina a dil a. Sawrkar thar chuan Mizoram hi Champhai khua atanga then thianghlim tan a tum niin a sawi bawk.

He hunah hian Champhai North Bialtu MLA Er. Ginzalala pawhin ram rorelnaa thu thei tura thlang tlingtu Champhai North bial mipuite chungah lawmthu sawiin, Mipuite leh sawrkar hotute chu anmahni finchhuah fo turin a chah a, thawhhona tha tak neih puiah sawiin, Champhai South bialtu MLA-te nen theihtawp chhuahin Champhai chu ‘Model Constituency’ ah hlankai ngei an tum thu a sawi a. Champhai South bialtu MLA Lt. Col. Clement Lalhmingthanga pawhin Champhai North mipui ten an tanpuina zarah MLA dinhmun a luah thei chu lawmawm a tih thu a sawi a. Dik leh tha zawka hna an thawh theih nan Department hotute finchhuah leh tanpuina a ngen nghal bawk.

Champhai a thlen hma hian Home Minister K. Sapdanga hian Saitual District tlawhin Department hotute leh khawtlang hruaitu te nen DC Conference Hall-ah an inkawm a, Home Minister chuan Minister a nih atangin Official a District a tlawh hmasak ber Saitual District a ni chu lawmawm a tih thu sawiin, Saitual, Khawzawl leh Champhai tlangdung chu International Boundary, ruihhlo veivahna kalkawng anih avangin Sawrkar, khawtlang hruaitu leh NGO te tan ho angai takzet a ni, a ti a. Kawng engkim ah dan chu dan a kal a ngaih thu sawiin, dan kengkawhtu te pawh theihtawp an chhuah tur thu a sawi bawk.

Home Minister hian nimin vek khan Khaw-zawl pawh tlawhin 2nd Bn. IR hmunpui Khawzawl Lungvar-ah amah lawmna hun hman a ni a, Mizo-ram sawrkar thar chuan khawtlang muanna leh mipuite thlamuanna a ngaipawimawh tih sawiin, tlawmngai pawl te nena thawkho in ram ralmuang, dan leh thupek tha taka kenkawhna siam theih sawrkarin a beisei thu a sawi a; sawrkar hnathawk, tlawmngai pawl hruaitute hemi kawngah hian thawhpui ah a sawm nghal a ni.

Heng District pathum tlawhtu Home Minister hi Excise Minister Lalnghinglova Hmar chuan tawiawmin ruihhlo dona kawngah Mizoram mipuite tanrual a ngaih takzet thu a sawi a. Mizoram sawrkarin ruihhlo do a ngaihpawimawh thu sawiin, 9th Mizoram Legislative Assembly thutkhawm hmasak berah Governor leh Chief Minister te pawhin an sawi chhuah thu a tarlang a. Mizoram in kawng tam takah hmasawnna hmu mah se, a chhawrtu tur thalaite ruihhlo vanga hnathawk thei lova an awm chuan hmasawnna chuan awmzia a nei dawn lo tih a sawi bawk.

Home Minister leh amah tawiawmtute hian Vawiin hian Zokhawthar panin Land Custom Station, Immigration Check Post, Bethel Refugee Camp leh Lipui Refugee Camp te a tlawh ang.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni