Mizoram-ah Armed Forces Flag Day hman a ni

Kum 1949 atanga kumtin December 7-a hman thin ‘Armed Forces Flag Day’ chu nimin khan rampumah hman leh a ni.

Armed Forces Flag Day-ah hian sipai huaisen, ram leh hnam tana nun hlan ta te hriatrengna leh la tanglai mek te Chibai bukna ni pah fawmin, ram leh hnam tana nun hlan ta te leh an chhungte mi harsa zual tanpui nan vehbur khawn thin a ni a. Aizawl-ah chuan nimin khan sawrkar Official hrang hrangte hnenah vehbur khawn niin, Rs.21,060/- hmuh a ni a, District Sainik Welfare Office pali ten Armed Forces Flag Day puala badge leh sticker sawrkar Department hrang hranga chan sak tura an sem atangin hmuh belh tura beisei a ni a. Tlawmngaia thawhlawm petu zawng zawngte leh Flag Day Material lei saktute chungah Sainik Welfare & Resettlement Department chuan lawmthu a sawi a ni.

He ni puala thuchah a siamah Mizoram Governor Dr. Hari Babu Kambhampati chuan, “Sipai sipaite hi kan ram vengtu dik tak, remna leh muanna min petu leh kan ram inrelbawlna leh thuneihna humhimtu an ni,” tiin tunlai Khawvel, hmun hrang hranga buaina a pung mekah hian kan sipai te hlutna leh pawimawhna te kan hriatthar a pawimawh takzet tih a sawi a, “Kan sipai leh an chhungte te hamthatna atana thahnemngai taka thawhlawm thawh turin mipui zawng zawngte thinlung takin ka ngen a che u. Mahni sahimna dahtha a kan tana venhim hna thawktute inpeknaa kan lawmthu sawina chu thilpek in I chhang theuh ang u,” a ti bawk.