MZP in NIT Mizoram-ah thil fello ram tak inphum ru a awm nia an hriat thu an sawi

Mizo Zirlai Pawl (MZP) chuan National Institute of Technology Mizoram (NIT Mizoram) in awp danah te, sum leh pai hman danah te leh thawktu lak danah te thil fello tam tak inphum ru a awm nia an hriat thu an sawi.

Nimin-a Aizawl Press Club-a thuthar thehdarhtute an kawmna ah MZP General Hqrs. hruaitute chuan NIT Mizoram hi India rama NIT 31 zinga mi niin, Ministry of Human Resources Development-in kum 2010-a a din a nih thu leh Lengpui-a NIT Mizoram hmunhma thar tur chu Oct. 13, 2012 khan khatihlaia Minister of Human Resource Development Kapil Sibal chuan phumin, tun thlengin sak puitlin a la ni lo tih an sawi a. Hetianga Technical zirna In tha Mizoram-in kan neihchhun, lungphum phum hnu kum 11-ah pawh sak puitlin a ni lo hian ngaihsak a hlawh tawk loh zia a tarlang chiang hle niin an sawi a. Chaltlang-a mi In hrang hrang luah hawha khawsa naw naw an nih avangin a chei that nan sum tam tak seng thinin tul lo ah sum leh pai tam tak an sengral thin niin an sawi bawk.

MZP chuan Mizoram-in Technical Institute lian kan nei chu lawmawm an tih thu sawiin, Mizoram tana chhenfakawm tura beiseina sang tak an neih mek laiin an beisei leh duh angin a awmlo hle tih tunhnaiah hmuhchhuah a ni tih an sawi a. “Institution in awp danah te, sum leh pai hman danah te leh thawktu lak danahte hian thil fello tam tak inphum ru a awmin MZP chuan kan hria a. Pawi kan ti tak zet zet a ni,” an ti a. He Institution a hna lak thenkhat chu a dik tawklo hle-a an hriat thu sawiin, “Induhsakna uchuak leh tih tlin tum neisa rana lak a awm tih hriat a ni. Advertisment chhuah rual vek ni si, post thenkhat chauh lak bik te, Board of Governor-in appointment approve an pek hma a appointment order rang taka tihchhuah te, hna exam thenkhat Observer tello a exam te a awm a. Chutih mek laia advertisement chhuah tawh tam tak tun thenga lak si lohte hi MZP chuan mak a ti a. A mawhphurtu chhuizui zel a tum a ni,” an ti.

He Instituion-ah hian sum hman dan felfai tawklo tam tak a awm nia an hriat thu leh CBI pawhin an chhui ngai hial khawpin sum hman dan hi a fello hle niin MZP chuan an sawi a, he Institution-ah hian thawktu thenkhat ten an hnuaia thawkte an duh ang anga an tih theih loh avangin an vau thin nia sawi a awm bawk thu te, Non Teaching-te kaisan theih nan Ministry-ah post sanction tura hmalakna lian tham a awm ngailo nia hriat a nih laiin Zirtirtu erawh an eligible lo chunga Grade Pay zuan khuma promotion pek a awm nia hriat a nih thu leh zirlaite tana Bus hire sak, bill pek theihloh avanga hun rei tak tak zirlaite kalvelna (Bus) tlan theilo te chu zirna in a tuar hle niin an sawi bawk a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni