Inspection Team ten District Jail dinhmun enfiah

District Child Protection Unit (DCPU) hnuaia Jail Inspection Team te chuan nimin khan Serchhip District Jail tlawhin kum tlinglo tang an awm leh awm loh an enfiah.
Nimin-a District Jail tlawhtu Inspection Team hi Principal Magistrate Josangzeli Tlau chuan hovin Jail an tlawh lai hian Serchhip District Jail-ah hian tang mi 77 awm mekin an zinga mi 12 te chu Hmeichhia an ni a. Jail tang zingah hian thil a tihsual laia kum tlinglo, kum 18 hnuailam nia insawi mi pakhat awmin chhui zui tura tih a ni. Serchhip District Jail-a hmeichhe tang mi 12 zinga 8 te hi Aizawl atanga rawn sawn te niin Nu, nau pawm tàng an awm lo a, harsatna lian tham tawk pawh awm lovin, an ei in leh an intihhlimna turte an mamawh thin avangin mi tlawmngai te thilpek an dawn zeuh zeuh thinah an lawm hle tih District Jail Superintendent Lalbiakthanga chuan a lo sawi a ni.

Hetihlai hian Serchhip District Jail-ah hian kum 2020-a East Lungdar khuaa man leh Serchhip District Jail-a dah Vietnam mi mipa kum 25 Dahn tia hriat chu enkawl mek ala ni bawk a. Amah hi man a nih hnu April 4, 2020 khan Serchhip District Jail-ah hian dah niin thubuai an siam sak hnuah kum hnih chhung lung In tang tu leh Rs. 10,000/- chawi tura hrem a ni a, sum hi chawi tur a nei lo a nih chuan thla hnih dang tan belh tura tih niin heng te hi nikum lamah tlak tawh mah se pan tur a neih loh avangin tun thleng hian Jail-ah hian enkawl ala ni.

He Jail tang hi anmahni hnam tawng chauh thiam leh hriatna tha tawk lo a nih avangin Serchhip DC kalchhuakta Nazuk Kumar khan sawrkar laipui hotute leh Vietnam Embassy-ah te pawh a chanchin hi a lo hrilh tawh nia thudawn a ni a. Amah hi Vietnam lam mi daih a nih bawk si avangin tun thleng hian hmalak zui vak ngaihna awm lo in Serchhip District Jail-a tang mek te zingah hian khawsa in an ei leh in te a zawm ve ta zel rih nia thudawn a ni bawk.