Thalai leh Pavalai thihna kan ram in a tuar chhan lian ber chu zu leh ruihhlo a ni tih CM in a sawi

Mizoram Chief Minister thar Lalduhoma chuan thalai leh Pavalai thihna kan ram in a tuar nasa em em tih sawiin, a chhan lian ber chu zu leh ruihhlo a nih thu a sawi.

Mizoram Chief Minister atana nimin-a lakluh Lalduhoma hian Raj Bhavan-a Ministry thar lakluhna hun a hman zawh hnuah Raj Bhavan atangin Sakawrtuichhun-a Tawngtai Bethel Camping Centre (TBCC) pan nghalin he Camping Centre enkawltute leh damlo enkawl lai mi 860 te chuan Chhung Inkhawm an lo buatsaih sak a. He hunah hian Chief Minister chuan an sawrkar huna tihtur pawimawh an duan te zinga pakhat chu 'Ram rorelnaah Pathian ram lo thleng rawh se' tih a ni tih sawiin, “He Pathian Lal ram lo thleng tur lo dipdaltu lian tak pakhat chu ruihhlo hi a ni. Thalai leh Pavalai thihna kan ramin a tuar nasa em em mai a, a chhan lian ber chu zu leh ruihhlo a ni,” tiin Chief Minister atana lakluh a nih hnua mahni In pawh tlawh lova helai hmun a tlawh chhan chu he Centre leh a anpui kan rama inenkawlna te an ngaipawimawh vang a ni tih a sawi a. “Zu leh ruihhlo laka kan thalaite humhim an nih theih nan sawrkar chuan theihtawp a chhuah dawn a, ruahmanna tha tak a siam thuai dawn a ni,” a ti.

Mizoram-a Home te, Jail te leh Centre hrang hrangte chu sual laka fihlim nan chauhva hmang lova fihlim tawh hnua eizawnna leh thiamna hlu tak tak hmuh theihna hmun atana buatsaih a pawimawh tih Chief Minister chuan sawiin, Ruihhlo lakah fihlim mahse engmah thawh tur leh tih tur neih zui si loh chuan ruihhlo ah bawk tluk leh a awl em em a, chuvang chuan Centre a thawktute leh sawrkar an tangho zel anga, mamawh leh tul awmte pawh inhrilh hreh lo ila, hma lam i pan zel ang u, tiin a sawm a. Damlo awm mekte chu mi pangngai, mite tih ang ti a, mite nih ang ni ve thei, mite nun dan pangai anga nung ve thei tura a beisei tlat thu a chah bawk.

Nimin-a TBCC-a Chhung Inkhawm hi he Centre dintu TT. Zohmingthanga'n a kaihruai a, Chief Minister tharin lakluh anih hnu lawka a tlawh nghal avangin lawmthu a sawi a, “Kan tan chuan theihnghilh theih tawh loh tur ni chhin-chhiah tlak a ni,” a ti a. “He Centre hian kum 19 kan pum lek lek tawh a Chief Minister meuhvin min rawn tlawh hi a vang hle a, Ruihhlo vanga thalai harsatna tawk mekte min chhanchhuah duhtu Chief Minister kan nei tih a chiang a, a thlamuanthlak hle a ni,” tiin lawmthu a sawi bawk. TBCC ah hian a dintute nupa bakah thawktu mipa leh hmeichhia pakhat an awm mek a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar