Candidate te senso enfiah dan tur zirhona neih a ni
Assembly Inthlanpui neih zawh taka Candidate te sum hman dan enfiahna hnuhnung ber hi ruahman lawk ang chuan kumin December 30 khian neih tur a ni a, hemi atana inbuatsaihna atan hian Zirtawpni kalta khan Ser-chhip District chhunga Constituency pathum - 26-Serchhip, 27-Tuikum leh 28-Hrangturzo-a Candidate tin te Account tihfel dan tur inhrilhriatna hun chu Serchhip District Bawrhsap leh DEO David Lalthantluanga hovin Serchhip DC Meeting Hall ah neih a ni a. He hunah hian Bawrhsap chuan Election Commission of India-in MLA candidate tin te sum hman dan felfai taka vawng tura a phut dan leh hman a phalsak chin cheng nuai 28 a bithliah thu a sawi a. Candidate zawng zawng te hian ECI kaihhruaina anga an Account te an tihfel loh chuan kum 3 thleng Inthlanna chuh thei lo tura hrem theih an nih thu te a sawi bawk.
Assembly Inthlanpui neih chhung hian Inthlanpui atana ruatbik Accounting Team te chuan Shadow Account vawngin Candidate te leh Political Party te sum senso hi ngun taka chhuiin, Account fel takin an vawng a. Candidate te aiawh Expenditure Agent te hian sum leh pai an hman-chhuah dan account an vawng bawk a. Expenditure Agent te leh Accounting Team te record enmil dan tur chu he hunah hian zirho a ni a. He hunah hian Serchhip District chhung Assembly Constituency pathum-a RO leh ARO te bakah candidate te leh Expenditure Agent te, inthlan chhunga accounting team member te he training ah hian an tel a ni.
Candidate te sum senso enfiahna hun hi Expenditure Observer ho-a neih tur niin Vawiin hian ruahmanna siam fel a nih beisei a ni.
Comments
Post a Comment