Boxing Hall tan thutthleng pe

Serchhip Boxing Hall-a hman turin Serchhip District Police te chuan nimin khan Thutthleng sei (Bench) 15 an hlan.
Heng thutthlengsei hlanna puala Serchhip SP Office Tual-a hun tawite hman ah SP mawhphurhna la mektu Addl. SP Saiding-liana Sailo chuan Serchhip Boxing Hall chu Serchhip District Boxing Association (SEDBA) lamin Programme ruahman lawk an nei chungin MLA Inthlanpui neih zawh takah Central Armed Force te awmhmun khuarna (Camp) atana tangkai tak leh phal taka SEDBA in an hmantir chu an lawm hle tih a sawi a. Serchhip Boxing Hall chu hmun laili leh remchang tak anih thu sawiin, Sipai te inkulhna atan chei ngai thenkhatte pawh a theih ang anga an chei thu leh heng te pawh hi thiat tawh lova hman zui theih tura an dah thu a sawi a, hun lola kal zel turah Serchhip SP Office ten an mamawh huna tul anga hman tangkai chhunzawm zel theih a beisei thute a sawi bawk. Hetianga thutthleng petu Serchhip Police te chungah an lawm hle tih SEDBA chuan an sawi bawk.