Deputy Speaker atan Lalfamkima thlan a ni

Mizoram Legislative Assembly thutkhawm nimin-a neih ah Deputy Speaker atan Kolasib bialtu MLA Lalfamkima chu chuhtu awm lova thlantlin a ni.

Nimin-a Assembly Session-ah hian Speaker Lalbiakzama chuan, Deputy Speaker thlanna neih tura hming pekluh theih hun niminpiah tlai dar 3:30 thleng khan Kolasib bialtu MLA Lalfamkima chauhin hming a pek luh avangin chuhtu awm lova thlan a ni tih a puang a. Speaker ngen angin Deputy Speaker thar hi House Leader Lalduhoma leh Opposition Leader Lalchhandama Ralte ten a thutna thleng an hruai a ni.

Nimin thutkhawm ah hian thutkhawm a nih veleh kumin November ni 14-a boral Minister hlui Lalbiakzuala sunna hun hman a ni a, House Leader Lalduhoma chuan Lalbiakzuala hi kum 1956 February ni 18-ah Teikhang khuaah a pian thu sawiin, ram leh hnam hmangaih mi a nih thu leh sawrkar hna tha tak a thawh bansanin Politics-ah a zunglut tih a sawi a. Kum 1993-ah INC Ticket in Khawhai bial-ah thlantlin a ni a, Political Secretary to Chief Minister ah dah niin, kum 1998 April-ah Minister of State atan lakluh a nih thu a sawi bawk. He hunah hian Opposition Leader Lalchhandama Ralte bakah Congress Member C. Ngunlianchunga leh BJP Group Leader Dr. K. Beichhua te pawhin Lalbiakzuala uina thu an sawi bawk a ni.